Apellyasiya Məhkəməsi Əziz Orucovu azad etməyib

Bakı/09.06.17/Turan: Bakı Apellyasiya Məhkəməsi "Kanal-13" internet televiziyasının direktoru Əziz Orucovun həbsindən verilmiş şikayəti təmin etməyib. Bu barədə Turan-a vəkil Cavad Cavadov bildirib.

Əziz Orucov CM-in 192.2.2 (böyük gəlir əldə etməklə qanunsuz sahibkarlıq) və 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) maddələri ilə ittiham olunur.

Vəkil Cavadov ittihamları əsassız hesab edir, Orucovun 192-ci maddə üzrə ittiham olunduğu əməllərə görə cinayət məsuliyyəti bir il əvvəl ləğv edilib.

Xüsusən, Orucov qanunsuz sahibkarlıq nəticəsində 8 min manat gəlir əldə etməkdə ittiham olunur. Amma 50 min manata qədər məbləğə görə cinayət məsuliyyəti nəzərdə tutulmur.

308.2-ci maddə üzrə ittihamların isə Orucovla heç bir əlaqəsi yoxdur.

"Əziz Orucov heç bir qrant müqaviləsi imzalamayıb. İrəli sürülmüş ittiham "Qafqaz" Media Araşdırmaları Mərkəzi ilə bağlıdır. Amma Orucov bu QHT-də məsul şəxs olmayıb. O, qrantların qeydiyyatına görə məsuliyyət daşımırdı. Bununla belə, bu QHT-nin qrantları qeydiyyata alınmışdı", deyə vəkil bildirib.

Onun sözlərinə görə, Orucovu "Kanal-13"ün fəaliyyətinə görə təqib edirlər.

Müdafiə tərəfi əsassız həbslə bağlı Avropa İnsan Hüquqları Məhkəməsinə müraciət etmək niyyətindədir.

Xatırladaq ki, ilkin olaraq Orucovu polisə tabe olmamaq ittihamı ilə 30 gün də həbs etmişdilər. Bu müddət başa çatdıqdan sonra ona qarşı cinayət ittihamları irəli sürülüb. -16B06-