Apellyasiya Məhkəməsi Fuad Əhmədlini həbsdə saxlayıb

Bakı/20.09.16/Turan:  Ötən gün Bakı Apellyasiya Məhkəməsi AXCP fəalı Fuad Əhmədlinin ev həbsinə buraxılmasından imtina barədə şikayətini təmin etməyib. Bunu Turan-a vəkil Əsabəli Mustafayev bildirib.

Vəkilin sözlərinə görə, F. Əhmədlinin barəsində həbs qətimkan tədbirinin dəyişdirilməsinə əsaslar olsa da məhkəmə bunu nəzərə almayıb.

F. Əhmədli avqustun 18-də saxlanılıb. Avqustun 19-da axşam Dövlət Təhlükəsizlik Xidməti və Baş Prokurorluq F.Əhmədlinin işi üzrə birgə bəyanatla çıxış ediblər. Məlumatda bildirilib ki, “Azerfon" MMC-də "Zənglər mərkəzi"ndə operator vəzifəsində işləyən Fuad Əhmədli abunəçilərə aid fərdi məlumatları və antenalar üzrə olduqları yerləri müəyyən adamlara ötürüb. İddiaya görə, onun yaşadığı evdən axtarış zamanı qanunvericiliklə qadağan edilmiş dini ədəbiyyat, CD disklər, Fətullah Gülənin çıxışları, “Hizmet imam”ları adlandırılan şəxslər və onların qarşılıqlı əlaqələrinə dair sənədlər götürülüb.

Avqustun 23-də hüquq-mühafizə orqanları F.Əhmədlinin işinin digər AXCP fəalı, Gülən təşkilatı ilə əməkdaşlıqda şübhəli bilinən Faiq Əmirovun işi ilə eyni icraata götürüldüyünü bildiriblər.

AXCP bu ittihamları rədd edərək onları yalan və qurama adlandırır.—06d--