Arif və Leyla Yunusların vəkilləri məhkəməni onlara bəraət verməyə çağırıblar

Dekabrın 7-də hüquq müdafiəçisi Leyla Yunusun və onun həyat yoldaşı Arif Yunusun apellyasiya şikayətinə baxılması zamanı vəkillər məhkəməni onlara bəraət verilməsinə çağırıblar.

Leyla və Arif Yunuslar 2014-cü ilin yayında həbs olunublar. Bu ilin avqustunda iqtisadi cinayətlər törətmək ittihamı ilə müvafiq olaraq 8,5 və 7 il azadlıqdan məhrum ediliblər.

Noyabrın 12-də Bakı Apellyasiya Məhkəməsi (BAM) A.Yunusu sağlıq durumu ilə əlaqədar ölkədən çıxmaq barədə iltizamla həbsdən azad edib.

L.Yunusun da vəziyyətinin ağır olmasına baxmayaraq, o hələ həbsdədir.

Dekabrın 7-də BAM-a Yunusların şikayətinə mahiyyəti üzrə baxılmasına başlanılıb.

Vəkil Elçin Sadıqov bildirib ki, birinci instansiya məhkəməsində müttəhimlərin günahı sübuta yetirilməyib. Bu səbəbdən  o, məhkəməni onlara bəraət verməyə çağırıb.   

“Əgər məhkəmə Leyla və Arif Yunuslara bəraət verilməsini lazım bilmirsə o zaman onların səhhətinin nəzərə alınmasını və azadlıqdan məhrumetmə ilə əlaqədar olmayan başqa cəza formasını tətbiq  etməyi xahiş edirəm. Çünki onların həbsdə qalması  həyatları üçün təhlükədir”, - E.Sadıqov vurğulayıb.

Hüquq müdafiəçisinin digər vəkili Ramiz Məmmədov ittihamın bütün bəndlərini şərh edərək onları əsassız adlandırıb. O qeyd edib ki, L.Yunus kommersiya fəaliyyətilə məşğul olmayıb, onun təşkilatının aldığı qrant isə vergiqoyuluşuna şamil edilmir. Odur ki, L.Yunusu qanunsuz sahibkarlıqda və vergidən yayınmada ittiham etmək olmaz.

Dələduzluq ittihamına gəlincə, iş üzrə faktiki olaraq zərərçəkən yoxdur, çünki qrant verən təşkilatların L.Yunusa iradları yoxdur.

Vəkil E.Qəmbərov da həmkarını dəstəkləyib.

A.Yunusun vəkili Əfqan Məmmədov müdafiə etdiyi şəxsə bəraət verilməsinə çağırıb.

Yunuslar öz vəkillərilə razı olduqlarını bildiriblər.

Öz növbəsində prokuror hökmün qüvvədə saxlanmasını təklif edib. Prokurorun çıxışı zamanı L.Yunus qulaqlarını bağlayaraq başını yırğalamağa başlayıb və bununla prokurorun mövqeyilə razı olmadığını bildirib.

Tərəflərin çıxışlarından sonra hakim şikayətə baxılmasının  davamını 10 dekabr saat 15:00-a təyin edib.—06C--