«Atletlər kəndi»ndə qəza ilə bağlı videonu yayan polisə 7, sürücüyə 3 il həbs istənilib

Ötən il Bakıda keçirilən Avropa Oyunları zamanı avstriyalı atletlərin vurulması ilə nəticələnmiş qəza işi üzrə məhkəmə istintaqı yekunlaşıb.

“Azadlıq” radiosunun məlumatında deyilir ki, iyulun 4-də Bakı Ağır Cinayətlər Məhkəməsində keçirilən məhkəmə iclasında dövlət ittihamçısı Eldar Həmzəyev çıxış edib.

Prokuror bildirib ki, təqsirləndirilən şəxslər günahsız olduqlarını desələr də, onlara qarşı ittihamlar məhkəmədə sübuta yetirilib.

Prokuror avtobusun sürücüsü Vəli Əhmədovun 3 il, həmin kadrları yaymaqda təqsirləndirilən polis əməkdaşı Elçin Həsənovun 7 il, Nəqliyyat Nazirliyinin Dövlət Avtomobil Nəqliyyatı Xidmətinin rəisi olmuş Hüseyn Salamovun 7 il, Xidmətin Bakı Regional şöbəsində Sərnişin Daşımalarının Tənzimlənməsi sektorunun məsləhətçisi Fərid Əmiraslanovun 5 il azadlıqdan məhrum olunmasını təklif edib.

Qeyd edək ki, F.Əmiraslanov istisna olmaqla, təqsirləndirilən digər üç nəfər həbsdədir. Prokuror F. Əmiraslanov və V.Əhmədovun cəzalarını məntəqə tipli cəzaçəkmə müəssisəsində çəkilməsini istəyib.

Prokuror çıxışında Gənclər və İdman Nazirliyinin bu qəza ilə bağlı Baş Prokurorluğa göndərdiyi məktubdan da bəhs edib. Orada göstərilib ki, qəza nəticəsində ağır xəsarət almış Vanessa Şahinoviçin reabilitasiyası üçün kompensasiyanın məbləği ilə əlaqədar Avstriya Olimpiya Komitəsi, bu ölkənin hüquq şirkətilə Azərbaycan arasında danışıqlar gedir. Məbləğin 1 milyon - 1 milyon 200 min civarında olacağı ehtimal edilir.

Hüseyn Salamov məhkəmədə ifadəsində bildirib ki, Avropa Oyunlarında sərnişindaşımada iştirak edən sürücülərin siyahısı keçmiş MTN-də və Xüsusi Dövlət Mühafizə Xidmətində yoxlamadan keçib. Birinci yoxlama nəticəsində MTN 286 sürücünün adını siyahıdan çıxarıb ki, onların arasında Vəli Əhmədov da olub. Təkrar yoxlamadan sonra MTN-in göndərdiyi yekun siyahıda isə adı çıxarılanlar arasında Vəli Əhmədov olmayıb.

Sürücü Vəli Əhmədovun vəkili bildirib ki, müdafiə etdiyi şəxs məcburi köçkündür, yataqxanada məskunlaşıb, günahını da etiraf edir və səmimi peşmandır. Vəkilin sözlərinə görə, onun ittiham olunduğu CM-nin 263-cü maddəsi ehtiyatsızlıqdan törədilən cinayətlər kateqoriyasına aiddir və verilən cəza da məntəqə tipli cəzaçəkmə müəssisəsində çəkilməlidir:

“Amma Vəli Əhmədov bir il bir aydır ki, həbsxana rejimində saxlanılır. Xahiş edirəm, bu müddəti yetərli hesab edəsiniz və ona ittiham olunduğu maddənin sanksiyasında nəzərdə tutulan daha az cəzanı verərək çəkdiyi cəza ilə kifayətlənib azadlığa buraxasınız”, - o deyib.

Görüntüləri yaymaqda təqsirləndirilən polisin vəkili isə ona bəraət verilməsini istəyib: "Elçin Həsənov bu hadisədən sonra işdən çıxarılıb və cəzalandırılıb. Onun görüntüləri yaymaqla dövlətin, Avropa Oyunlarının nüfuzuna xələl gətirmək istədiyi barədə ittihamda yazılanlar həqiqətəuyğun deyil".

Məhkəmə prosesi iyulun 11-də digər vəkillərin çıxışı ilə davam edəcək.

Xatırladaq ki, 2015-ci il iyunun 11-də "Atletlər kəndi"nin nəqliyyat deposunda, "Bakubus" MMC-yə məxsus avtobus hərəkət zolağından çıxaraq, Avstriyanın sinxron üzgüçülük üzrə yığma komandasının üzvləri Vanessa Sahinoviç, Luna Pacer və Verena Breyti vurub.-03D-