AXCP fəalı Elnur Fərəcov üç il müddətinə azadlıqdan məhrum edilib

Bakı/05.05.17/Turan: Azərbaycan Xalq Cəbhəsi Partiyasının (AXCP) fəalı Elnur Fərəcov yerli məhkəmə tərəfindən 3 il müddətinə azadlıqdan məhrumetmə cəzasına məhkum edilib. O, CM-in 234.2-ci (narkotik vasitələrin və psixotrop maddələrin satış məqsədilə qanunsuz əldə edilməsi və saxlanması, hazırlanması, istehsalı, emalı, daşınması, göndərilməsi və ya satılması) maddəsi ilə təqsirli bilinib.

Bu barədə Turan-a vəkil Nemət Kərimli bildirib. Vəkil qeyd edib ki, hökmdən şikayət veriləcək.

Fərəcova qarşı cinayət işi 2016-cı ilin dekabrında açılıb.

Vəkilin sözlərinə görə, Fərəcova qarşı təxribat törədilib. Belə ki, bir nəfər Fərəcovla tanış olaraq, rayonda biznes qurmaq istədiyini deyib. O, Fərəcova onu işlə təmin etməyə söz verib.

Fərəcov onunla razılaşıb və onlar birlikdə çayxanaya gediblər. Bu zaman polis çayxananı mühasirəyə alıb və onun tanışının cibindən narkotik götürüblər. O isə narkotik vasitəni Fərəcovdan aldığını deyib. Bu şəxsi guya "istintaqa yardım etdiyinə" görə məsuliyyətdən azad ediblər. Fərəcov barəsində isə qətimkan tədbiri seçilib.

Vəkilin sözlərinə görə, Fərəcovun işi siyasi işdir və təqsirləndirilən şəxsin müxalif fəaliyyəti və onun etiraz aksiyalarında iştirakı ilə bağlıdır. -06D-