"Azadlıq" qəzetinin bank hesablarına həbs qoyulması qanunsuzdur

Media Hüququ İnstitutu “Azadlıq” qəzetinə məxsus bank hesablarının üzərinə həbs qoyulmasını bu önəmli media quruluşuna qarşı qanuni bəraəti olmayan təzyiq kimi dəyərləndirir, hökumətin tənqidçi mediyanın sıxışdırılmasına xidmət edən qanunsuz qərara səssiz qalmasından təəssüflənir.

Son 1 ildə məmurlar, millət vəkilləri, hökumətə bağlı biznes adamları “Azadlıq” qəzetinə qarşı 10-a yaxın defamasiya iddiası qaldıblar. Yerli məhkəmələr baxdıqları iddiaların əksəriyyətini təmin ediblər. Bakı Metropoliten İdarəsinin rəisi cənab Tağı Əhmədovun, millət vəkili cənab Novruzəli Aslanovun, ”Binə” Ticarət Mərkəzinin rəhbəri Kəbirə xanım Məmmədovanın, iş adamı cənab Anar Məmmədovun iddialarına baxan məhkəmə qəzetin və onun əməkdaşlarının üzərinə ümumilikdə 65 000 AZN-dən çox təzminat yükü qoyub. “Azadlıq” qəzeti həmin vəsaitin 4200 AZN-i Azərbaycan Nəqliyyat Nazirinin oğlu, “ZQAN Holdinq” Şirkətlər Qrupunun rəhbəri A.Məmmədovun istəyi üzrə Buzovna qəsəbəsindəki Ruhi-Əsəb-Əlil Qocalar Evinin hesabına ödəməlidir. A. Məmmədov “Azadlıq” qəzetini Qəbələ rayonunda ayı kəsdirib yeməsindən bəhs edən yazıya görə məhkəməyə vermiş, məhkəmə qəzeti cərimələmişdi.

Yasamal Məhkəməsi icra şöbəsi qəzetin bank hesabına həbs qoyulmasını məhz Anar Məmmədov “Azadlığ”a qarşı işi üzrə qərarın icraya yönəldilməsi ilə əsaslandırıb. MHİ Yasamal İcra Şöbəsinin qəzetin bank hesabı üzərinə həbs qoymasının aşağıda sadalanan çox ciddi hüquq pozuntuları ilə müşayət olunduğunu bildirir:

Qəzetin bank hesabı üzərinə həbs qoyulmasının qüvvəyə minmiş məhkəmə qərarının olması arqumenti ilə əsaslandırılması tamamilə qanunsuzdur. Çünki, yuxarıda qeyd olunan Anar Məmmədov “Azadlığ”a qarşı işi üzrə qəzetin maddi təzminat ödəməsini nəzərdə tutan qərarının icraya yönəldilməsindən bir həftə öncə məhkəmə qaydasında şikayət edilib. “Məhkəmə qərarlarının icrası haqqında” Azərbaycan Respublikası Qanununun 17-ci maddəsinə görə, icra ilə bağlı iddia qaydasında mübahisə qaldırılarsa, icraatın dayandırılması məcburidir. Həmin qanunun 19-cu maddəsinə görə, belə durumlarda icraat iddia üzrə mübahisə bitənədək dayandırılmalıdır. Məhkəmə icraçıları qanunun bu maddələrini pozublar.

 Məhkəmə icraçılarının hüquqi qüvvəsi olan qərara söykənmədən “Azadlıq”ın bank hesabı üzərinə həbs qoyması gündəlik nəşrin iş mühitini iflic edib. Bu eyni zamanda jurnalistin qanuni peşə fəaliyyətinə mane olmağa görə məsuliyyət yaradan əməldir.

Media Hüququ İnstitutu yuxarıda sadalanan pozuntularla müşayət olunan qərarı ölkədə söz azadlığına ciddi müdaxilə sayır, ölkədə çoxsəsliliyi təmin edən qəzetin sıradan çıxarılmasına xidmət etdiyini vurğulayır. Media Hüququ İnstitutu “Azadlıq” qəzetinə qarşı bu qanunsuz addımı qətiyyətlə pisləyir, hökuməti qanunsuzluğa yol vermiş və onları icra etmiş şəxslərin hərəkətlərini araşdırmağa, ölçülər götürməyə, media qurumunun pozulmuş haqlarını bərpa etməyə çağırır.