AZAL Bakı-İstanbul-Bakı marşrutu üzrə iki reys həyata keçirəcək

Bakı/15.06.20/Turan: AZAL aviaşirkəti iyunun 17 və 18-də Bakı-İstanbul-Bakı marşrutu üzrə xüsusi reyslər həyata keçirəcək.

“Bilet satışına iyunun 15-də başlanılacaq. Reyslərə hər istiqamətdə 150 sərnişin qəbul ediləcək”,- AZAL-ın mətbuat xidmətinin məlumatında bildirilir.

Aviadaşıyıcı qeyd edir ki, Bakı-İstanbul reysinə biletləri həm Azərbaycan, həm də Türkiyə vətəndaşları, İstanbul-Bakı reysinə isə yalnız Azərbaycan vətəndaşları ala bilər.

“Türkiyəyə səfər edən Azərbaycan vətəndaşları Türkiyə ərazisinə daxil olma qaydaları ilə tanış olmaq və müvafiq icazələrin alınması üçün Türkiyənin Azərbaycandakı səfirliyinə müraciət etməlidirlər”, - məlumatda qeyd olunur.

Yeni qaydalara əsasən reyslərə Tibbi Ərazi Bölmələrini İdarəetmə Birliyinin (TƏBIB) xüsusi laboratoriyalarında COVID-19 üzrə testdən keçərək mənfi cavab alan sərnişinlər buraxılacaqlar.

Bununla yanaşı, İstanbuldan olan sərnişinlər qeydiyyat masasında İstanbuldakı “Memorial Sağlık Grubu” klinikasının təqdim etdiyi və uçuşa 48 saat qalmış alınan COVID-19 üzrə mənfi nəticəni göstərən sənədi təqdim etməlidirlər.

Belə olan halda İstanbul-Bakı reysilə səfər edən və COVİD-19 üzrə mənfi nəticəsi olan Azərbaycan vətəndaşları karantinə yerləşdirilmək tələbindən azad edilirlər. Lakin COVİD-19 simptomları olan sərnişinlər təkrar müayinədən keçirilə bilər, AZAL qeyd edir.-06D-