ABŞ qadınların sülh proseslərində iştirakını genişləndirməyə çalışır

Vaşinqton/15.06.20/Turan: Vaşinqton bütün dünyada, o cümlədən postsovet regionunda qadınların münaqişələrin qarşısının alınmasına və nizamlanmasına töhfə vermək ümidini  artırmağın yollarını tapmağa çalışır. Bu barədə qadınların qlobal problemləri üzrə amerikalı diplomat Kelli Kerri jurnalistlərə bildirib, Turan-ın Vaşinqton müxbiri məlumat verib.  

Cümə axşamı Trump administrasiyası “Qadınlar, sülh və təhlükəsizlik” (WPS) strategiyasının həyata keçirilməsi planlarını açıqlayıb. Planda dünyada qadınların liderliyi, cəlb edilməsi və təhlükəsizliyini təşviq etmək üçün “mühüm addımlar” atılacaq.
Səfir Kelli Kerri Dövlət Departamentinin Xarici Mətbuat Mərkəzinin təşkil etdiyi virtual brifinq zamanı jurnalistlər qarşısında çıxış edərək strategiyanı “prioritet məsələ” adlandırıb. Qadınların münaqişələrin qarşısının alınmasına və həllinə töhfələrinə baxmayaraq, onların dünyanın bəzi yerlərində, o cümlədən Qafqazda münaqişələrin həllində iştirakı mədəni təzyiq, resursların çatışmazlığı və s. kimi bir sıra amillərlə məhdudlaşıb.

“ABŞ postsovet məkanında sülh proseslərinə, o cümlədən Qarabağ nizamlanmasına qadınların cəlb olunmasına necə kömək edə bilər” sualının cavabında Kerri  Turan-ın müxbirinə deyib ki, Vaşinqton regiondakı indiki nəsil qadınları birləşdirməyə çalışır. O, nümunə kimi  hər il keçirilən “Qadınlar cəsarətə görə” beynəlxalq mükafatının builki laureatlarını qeyd edib. Həm Azərbaycan, həm də Ermənistandan olan qaliblər dövlət katibinin əlindən mükafatları alıblar, sonra isə  “Beynəlxalq ziyarətçilər” proqramı çərçivəsində ABŞ-a səfərlərini davam etdiriblər.

“Biz bu iki gözəl qadının bir-birini daha yaxşı tanımasına, uzun müddət ünsiyyətdə olmasına kömək etdik və bu, çox yaxşı idi”, - Kerri deyib.
WPS reallaşma planları 2023-cü ilə qədər qadınların sülh səylərində iştirakın genişləndirilməsi, dövlət və özəl yardım proqramlarına bərabər çıxış imkanlarının təmin edilməsi daxil olmaqla, bir neçə strateji məqsədə necə nail olacaqlarını müəyyən edir.

“Düşünürük ki, bizim plan xarici siyasət aparatımızı və biznesin aparılması üsulunu dəyişməyə kömək edəcək. Məqsəd də budur” , - Kerri əlavə edib.

USAID-in administratoru vəzifəsini icra edən Con Barsın sözlərinə görə, son iki ildə agentlik WPS  strategiyasına uyğun olaraq proqramlaşdırmaya 200 milyon dollardan çox vəsait xərcləyib.
“Bu işin sayəsində biz artıq qadınların münaqişələrin qarşısının alınmasına və həllinə qoşulmasının təsirini görürük", - o deyib. -0-