Media-icmal 15.06.20

Biznes obyektlərində aparılan monitorinqlər, incəsənət sahəsində süstlüyün səbəbləri, pandemiya ilə bağlı vəziyyət və s. məsələlər medianın aparıcı mövzuları sırasındadır.

Obyektlərin çoxunda buna əməl olunmur

Rəsmi “Azərbaycan” qəzeti “İqtisadiyyat Nazirliyinin monitorinqləri davam edir” sərlövhəli məqalədə müəllif iyunun 12-də xüsusi karantin, zəruri sosial davranış qaydaları və sanitar-epidemioloji tələblərə əməl olunmasına nəzarət məqsədilə İqtisadiyyat Nazirliyinin müxtəlif iqtisadi müəssisələrdə keçirdiyi monitorinqlərin nəticələrini dəyərləndirir.

Müəllifin deməsinə görə, bu monitorinqlər bəzi rayonlarda, eləcə də paytaxt Bakıda tikinti materialları, ərzaq, tibbi preparat satışı obyektlərini, gözəllik və çiçək satışı salonlarını, bir sıra marketləri əhatə edib.

Müəllif monitorinqlərin nəticələrinə istinadən deyir ki, əksər obyektlərdə koronavirus pandemiyasına qarşı mübarizədə nəzərdə tutulan tələb və qaydalara əməl olunmayıb.

“Pərakəndə ticarət obyektində, ümumilikdə monitorinq aparılmış 383 obyektin 155-də zəruri sosial davranış qaydalarına və sanitar-epidemioloji tələblərə əməl olunmaması hallarına rast gəlinib” deyə müəllif nazirliyə istiandən bildirir.

Müəllif əlavə edir ki, belə monitorinqlər paytaxt Bakının Nəsimi, Yasamal, Nizami, Abşeron, eləcə də ölkənin Masallı, Ağdaş, Daşkəsən, İsmayıllı, Füzuli, rayonlarında bir sıra obyektləri əhatə edib. 

Müəllifə görə, nazirlik əməkdaşları sahibkarlarla maarifləndirici söhbətlər aparıb, xüsusi karantin, zəruri sosial davranış qaydalarına və sanitar-epidemioloji tələblərə tam əməl olunması zərurətini bir daha izah ediblər.  

Xatırladaq ki, 2020-ci il mayın 22-dən iyunun 13-dək 5759 sahibkarlıq subyektində monitorinq keçirilib və 2528 obyektdə zəruri sosial davranış qaydaları və sanitar-epidemioloji tələblərin pozulması halları aşkarlanıb.

Hər şey pulun başındadır

“Moderator.az” saytında  yer alan “Xalq artisti: “Hər şey pulun başındadır...” sərlövhəli məqalədə müəllif  erməni tərəfin yaxın və uzaq tarixi gerçəkləri öz xeyrinə təhrif edərək incəsənət spektrində Azərbaycan əleyhinə təbliğatı gücləndirməsi barədə xalq artisti Afaq Bəşirqızı ilə söhbətləşir.

Müəllif əlavə edir ki onlar aprel döyüşləri haqda “Cənnətə açılan qapılar” filmi ilə dünyaya çıxmağa başladılar və iyunun 22-26-da həmin film Kann kinofestivalının keçirəcəyi və Avropanın ən böyük kino bazarı olan “Marche du Film” tədbirində  film təqdim olunacaq.

Müəllifin deməsinə görə, indi isə Qarabağ torpaqlarında lentə alınan, Xocalı aeroportu nümayiş edilən “Əgər külək olsa” filmini Kann festivalına təqdim ediblər.

Müəllif vurğulayır ki, bununla bağlı Dağlıq Qarabağın azərbaycanlı icması Kann festivalının təşkilatçılarına etiraz məktubu göndərib.

Yazı müəllifi deyir ki, Azərbaycan tərəf bu müddətdə nə aprel döyüşləri haqda film çəkib, nə erməni işğalını kreativ, fərqli ssenarilər, filmlərlə ifşa edə bilib, nə də dünyaya bir mükəmməl iş təqdim eldib, yəni ortalıqda bir fəaliyyət yoxdur.

Xalq artisti Afaq Bəşirqızı isə deyir ki, yaxşı filmlərin ərsəyə gəlməsi üçün maliyyə lazımdır: “Hər şey pulun başındadır. Yaxşı maliyyə verilsə, elə ssenarilər yazılar ki… İntəhası, pul yoxdur. Dövlət 21 milyon ayırıb, 21 nəfər də ac var. Onların hansına çatdırasan. İndi yəqin o puldan nəsə qalsa, bir film çəkərlər”. 

Onun fikrincə, indi hamı gəlirini, biznesini fikiləşir: “Fikirləşir ki, o işdən mənə nə qalacaq? Ona görə kəmiyyətin keyfiyyətə basqını varsa, biz heç nə edə bilməyəcəyik”.

Bu virus hədəflərini “cavanlaşdırır”

“Yenisabah.az”da dərc olunan “Hazırda mənzərə dəyişib, vəziyyət ciddidir” sərlövəhli məqalədə isə müəllif Azərbaycanda koronavirus pandmeiyası ilə bağlı durumu ölkənin baş infeksionisti Cəlal İsayevlə dəyərləndirir.

C.İsayev deyir ki, bu virus artıq hər kəsə yoluxur, bu isə vəziyyəti daha da çətinləşdirir, yoluxma üzrə rəqəm dinamikası yüksəkdir.

Xəstəliyi yüngül keçirən şəxslərin müalicəni evdə davam etdirmələrinə gəlincə, C.İsayev deyir ki, hazırda xəstəxanalarda yer sarıdan bir az çətinlik yarandığına görə bu cür xəstələrin ev şəraitində müalicəsinə qərar verilib. Hesab edirəm ki, bu, düzgün addımdır.

Sərt karantin rejiminin nəticə verə biləcəyinə gəlincə, baş infeksionist deyir ki, bu, yoluxucu virusdur: “Bu, infeksiyadır. Hesab etməyin ki, tədbirlər görüldükdə qısa zamanda xəstələrin sayı azalacaq. Bəli, bu tədbirlər xəstələrin sayını azaltmaq istiqamətində tətbiq olunur. Dünən (13 iyun-red.) 352 yeni yoluxma faktı qeydə alındı. Çalışırıq ki, bu say 500 olmasın”.

Onun sözlərinə görə, son vaxtlar gənclər arasında yoluxma halları daha çox qeydə alınır: “Hazırda mənzərə dəyişib, vəziyyət ciddidir. Yoluxma müxtəlif yaş qruplarında bir qədər fərqlə müşahidə olunur. Vəziyyəti ağır olanlar arasında gənclər daha çoxdur. Bu isə koronavirusun bilinməyən tərəflərini aşkara çıxarır”.