AZAL İstanbula daha iki xüsusi reys yerinə yetiriləcək

Bakı/20.06.20/Turan: “Azərbaycan Hava Yolları” QSC 25 və 26 iyun tarixlərində Bakı-İstanbul-Bakı marşrutu üzrə daha iki xüsusi reys həyata keçirəcək.

QSC-dən verilən məlumata görə, hər bir istiqamətdə reysə 150 sərnişin qəbul ediləcək.  Bakı-İstanbul reyslərinə Heydər Əliyev adına Beynəlxalq Hava Limanının 1-ci Terminalında (Terminal 1) xidmət göstəriləcək.

Aviabiletlərin satışı aviaşirkətin www.azal.az rəsmi saytında açıqdır.

Amma sosial şəbəkələrin bir çox istifadəçiləri bilet alarkən çətinlik yaşadıqlarından şikayət edirlər. Satış açıldıqdan dərhal sonra onlar bilet alışı üzrə əməliyyatlara başlasalar da, bilet əldə edə bilməyiblər. Şəxsi məlumatları doldurduqdan sonra sistem növbəti komandaları qəbul etməyib. Təxminən 10-15 dəqiqə sonra isə satış yekunlaşıb.

Yeni qaydalara uyğun olaraq, yalnız koronavirus (COVID-19) testindən keçmiş və mənfi nəticə əldə etmiş sərnişinlər uçuşlara buraxılır. Tibbi Ərazi Bölmələrini İdarəetmə Birliyi (TƏBİB) tərəfindən akkreditə olunmuş laboratoriyaların siyahısı:

-  İnci laboratoriyası - Bülbül prospekti, 40. Əlaqə telefonu: +994 51 229 49 80

-  Referans Klinik Laboratoriya Mərkəzi - Mirzəbala Məmmədzadə küçəsi. Əlaqə telefonu: +994 70 653 00 33

- Memorial Klinik, Qara Qarayev prospekti, 38a. Əlaqə telefonu: +994 12 520 30 40.

İstanbuldan uçuş zamanı hava limanında qeydiyyatdan keçərkən Türkiyə Səhiyyə Nazirliyinin saytında qeyd olunan Türkiyə klinikalarından biri  tərəfindən verilmiş COVID-19-a dair neqativ nəticə barədə arayış təqdim edilməlidir: https://covid19bilgi.saglik.gov.tr/tr/covid-19-yetkilendirilmis-tani-laboratuvarlari-listesi

Bu halda İstanbul-Bakı reysi ilə gələn Azərbaycan vətəndaşları karantindən azad edilirlər. Lakin həmin reysin sərnişinlərində COVID-19 əlamətləri aşkar edildikdə onlar təkrar surətdə tibbi müayinədən keçirilə bilərlər. -06D-