Azəravtoyol: Yol təsərrüfatına ciddi ziyan dəyib

Bakı/31.03.18/Turan: Son günlər qeyri-sabit və küləkli hava nəticəsində yol təsərrüfatına ciddi ziyan dəyib. Bu barədə Azərbaycan Avtomobil Yolları Dövlət Agentliyi məlumat yayıb.

Açqılamada deyilir ki, güclü külək paytaxt da daxil olmaqla, ölkənin küçə və prospektlərində, avtomobil yollarında quraşdırılmış yol nişanları və məlumatverici lövhələri qoparıb.

"Yol təsərrüfatına ən böyük ziyan Bakı Dairəvi-1 avtomobil yolunda, İnşaatçılar prospektindəki "Statistika dairəsi"də və Bakı Olimpiya stadionunun yaxınlığında quraşdırılmış məlumat lövhələri aşması ilə dəyib. Ümumilikdə ilkin hesablamalara görə, dəymiş ziyanın məbləği 25 min manata yaxındır", açaıqlamada vurğulanır.

Açıqlamaya görə, Bakı-Ələt-Qazax-Gürcüstanla dövlət sərhədi avtomobil yolunda, Bakının Qaradağ rayonunda 2 yük maşını güclü küləyin yaratdığı təhlükəli vəziyyət səbəbindən idarəetmədən çıxaraq aşıb. "Scania" və "Iveco" markalı hər iki yük maşınının Bakıya gələrkən aşması nəticəsində yol ayrıcında quraşdırılmış 100 paqon-metrə yaxın əyri-xətli dəmir tirləri və 2 ədəd işıq dirəyini sıradan çıxıb, yol təsərrüfatına 10 min manata yaxın ziyan dəyib.

Xatırladaq ki, Ekologiya və Təbii Sərvətlər Nazirliyi Milli Hidormeteorologiya Departamenti martın 29-da açılqadığı hava proqnozunda martın 30-u və 31-də ölkə ərazisində güclü şaimal-qərb küləyi əsəcəyi xəbərdarlığı etmişdi, martın 30-da küləyin sürətinin 30-32 m/s, martın 31-də 35-38m/s. gücündə olacağı bildirilirdi.-0-