Azərbaycan dəmir yolu siqnalizasiyasını öz qiymətindən 5,5 dəfə baha qiymətə alıb

İki həftə öncə İsveçdə Bombardier şirkətinin əməkdaşı Yevgeni Pavlov  saxlanılıb. O və firmanın digər menecerləri Azərbaycanda sövdələşmələr zamanı korrupsiyada şübhəli biliniblər.

AP agentliyinin məlumatına görə, İsveçin SVT teleşirkəri, TT agentliyi, Kanadanın Radio Canada şirkəti, Korrupsiya və Mütəşəkkil Cinayətkarlığın Araşdırılması üzrə Jurnalist Mərkəzi Bombardier-in Azərbaycandakı sövdələşmələri ilə bağlı birgə araşdırma aparıblar.

Söhbət 46 stansiyaya dəmir yolu siqnalizasiyanın göndərilməsindən gedir. Sənədlərə görə, avadanlıq birbaşa Azərbaycana göndərilir, buna görə pul isə Londonun hansısa firmasından keçir.

Sonda siqnalizasiya satışı üzrə əqdlər  iki müqavilə ilə sənədləşdirilir. Birinci müqaviləyə görə, avadanlıq Londonun Multiserv Overseas şirkəti tərəfindən 126 milyon krona satılır. Şirkətin nə ofisi, nə telefonu, nə də əməkdaşları yoxdur.

Sonra Multiserv Overseas həmin avadanlığı yenidən Azərbaycana 104 mln. dollara satır. Beləliklə, İsveçdən Azərbaycana gələn dəmir yolu siqnalizasiyasının yekun qiyməti 5,5 dəfə artıb.

  Bombardier bildirib ki, London firması təkcə təkrar satış ilə məşğul olmur, həm də başqa xidmətlər göstərir.

İsveç prokurorluğunun versiyasına görə, azərbaycanlı məmurlar dəmir yolu siqnalizasiyasının göndərilməsi üzrə sövdələşmənin razılaşdırılmasına görə Bombardier-dən pul alıblar.

Hüquq-mühafizə orqanları diqqəti ona yönəldir ki, 2013-cü ildə tenderdə başqa şirkətlər də iştirak ediblər. Onlar daha aşağı qiymət təklif ediblər. Ancaq müqavilə Bombardier ilə imzalanıb.

Azərbaycanda dəmir yolu hissəsinin modernləşdirilməsində Rusiyanın Bombardier Transportation törəmə şirkəti (36% Rusiya Dəmir Yolları Dövlət Konserninə məxsusdur) iştirak edib. Bu şirkət İsveç prokurorluğunun araşdırmalarında adı keçən Bombardier-in İsveç bölməsinin avadanlığından istifadə edərək avtomatlaşdırma sisteminin yenilənməsi üzrə işləri həyata keçirib. -02D-