Azərbaycan Talışların İctimai Şurası bloger Qurbanov barəsində hökmü pisləyib

Bakı/04.05.21/Turan: Azərbaycan Talışların İctimai Şurası bloger Aslan Qurbanovun 7 il müddətinə azadlıqdan məhrum edilməsi barədə hökmü pisləyib.

Şuranın bəyanatında deyilir ki, sosial şəbəkələrdə talış xalqının dilinin və mədəniyyətinin təbliğ olunması ilə məşğul olan Qurbanov 2020-ci il iyulun 14-də hüquq-mühafizə orqanları tərəfindən saxlanılıb.

Uzun müddət davam edən istintaqdan sonra 2021-ci il aprelin 15-də Bakı Ağır Cinayətlər Məhkəməsi Aslan Qurbanovu Cinayət Məcəlləsinin 281.2 (dövlət əleyhinə yönəlmiş açıq çağırışlar) və 283-1-ci (milli, irqi, sosial və ya dini ədavət və düşmənçiliyin salınması) maddələri ilə təqsirli bilib və onu 7 il müddətinə azadlıqdan məhrum edib.

İctimai Şuranın məlumatına görə, ittiham Qurbanovun Feysbuk və Vatsap yazışmaları əsasında qurulub. İstintaq qanun pozuntuları və Qurbanovun hüquqlarının pozulması ilə keçirilib, iş üzrə dindirilən şahidlər və ailə üzvləri psixoloji təzyiqə məruz qalıblar, məhkəmə iclasları çox vaxt qanuni əsas olmadan qapalı keçirilib. “Bakı Ağır Cinayətlər Məhkəməsində keçirilən məhkəmə dindirilmələri, eləcə də Məhkəmənin ona qarşı çıxartdığı Hökm ilə tanış olan hər kəsə bir daha bəlli olur ki, Aslan Qurbanova qarşı çıxarılan 7 (yeddi) il həbs cəzası ədalətsiz, sifarişli və qərəzlidir”, deyə Azərbaycan Talışların İctimai Şurasının bəyanatında bildirilir.

Təşkilat Qurbanovun işini mənsub olduğu xalqın ana dilinə, mədəniyyətlərinə biganə qalmayan digər talış gənclərinə “qulaqburma” aktı kimi qiymətləndirir. Şura hakimiyyətdən vətəndaşlarına qarşı hər cür milli-etnik ayrı-seçkiliyə son qoymağı tələb edir. -06В-