Şuşada müharibə zamanı dağılan kilsə bərpa edilir

Bakı/04.05.21/Turan: Dünən Ermənistan kütləvi informasiya vasitələri Azərbaycanı Qarabağdakı abidələrə qarşı növbəti “mədəni soyqırım” dalğasında ittiham ediblər. Buna Şuşa şəhərində Kazançetsots (Qazançılar – Azərb.) kilsəsində aparılan bərpa işləri səbəb olub.

Xatırladaq ki, İkinci Qarabağ Müharibəsi zamanı artilleriya mərmisi düşməsi nəticəsndə bu kilsəyə ciddi ziyan dəyib.

Şəhər işğaldan azad edildikdən sonra Azərbaycan hakimiyyəti bu kilsə də daxil olmaqla, dağıdılmış obyektlərin bərpasına başlayıb.

90-cı illərin ortalarında şəhəri işğal edən ermənilər bu kilsəni təmir edərək görünüşünü dəyişdiriblər. İlk növbədə əvvəllər mövcud olmayan gümbəz ucaldılıb.

Hazırda kilsənin bərpa edilməsi və ilkin görünüşünün qaytarılması üzrə işlər aparılır, bu barədə Turan-a vəziyyətlə tanış olan məlumatlı mənbə bildirib.

“Gümbəzin məhv edilməsi haqqında bütün iddialar əsassızdır. Vaxtilə məhz ermənilər köhnə gümbəzi söküb kilsənin ilkin görünüşünü dəyişdirmişdilər”, deyə mənbə bildirib. -02B-