Azərbaycan Xalq Cəbhəsi Partiyası Niyaməddin Əhmədova işgəncə verildiyini bildirib

Bakı/17.06.22/Turan:  Xalq Cəbhəsi Partiyasının fəalı, 12 saylı koloniyada saxlanılan Niyaməddin Əhmədov fiziki təzyiqlərə və işgəncələrə məruz qalıb. Bu barədə Azərbaycan Xalq Cəbhəsi Partiyasından bildiriblər.

"Onu döyüblər, saçını kəsiblər və bir neçə gün karserdə saxlayıblar. Ümumi baraka qayıdandan sonra Əhmədova töhmət veriblər, cəzasını sərtləşdirməklə, Qobustan qapalı həbsxanasına göndərilməklə hədələyiblər", - partiyadan bildiriblər.

Penitensiar Xidmətdən şərh almaq mümkün olmayıb.

Qeyd edək ki, Əhmədov Azərbaycan Xalq Cəbhəsi Partiyasının lideri Əli Kərimlinin ictimai əsaslarla mühafizəçisi olub.

2020-ci il aprelin 16-da karantin rejimini pozma və polisə müqavimət ittihamı ilə saxlanılıb və 30 sutka müddətinə həbs edilib.

Sonra səbəb kimi xaricdən pul alınmasını göstərərək ona qarşı terrorizmi maliyyələşdirmək ittihamı irəli sürülüb.

Əhmədov həbsdə olarkən işgəncələrə məruz qalıb, onu partiya liderinin əleyhinə ifadə verməyə məcbur ediblər. Lakin o ifadə verməyib.

2021-ci il oktyabrın 8-də məhkəmə onu 13 il müddətinə azadlıqdan məhrum edib. Martın 2-də Bakı Apellyasiya Məhkəməsi hökmü qüvvədə saxlayıb.

Hüquq müdafiəçiləri Niyaməddin  Əhmədovu siyasi məhbus kimi tanıyıblar. 16В06