Azərbaycan ziyalıları və diasporlar ölkə rəhbərliyindən Məhəmməd Əmin Rəsulzadənin Ev Muzeyinin yaradılmasını xahiş edirlər

Bakı/30.01.20/Turan: AXC-nin banisi Məhəmməd Əmin Rəsulzadənin (1884-1955) Ev Muzeyinin yaradılması ilə bağlı təşəbbüs qrupunun niyyətinə həsr olunmuş elmi-praktik konfransın ilk günü Azərbaycan prezidentinə və birinci vitse-prezidentə kollektiv müraciət ilə başa çatıb.

Dövlət rəhbərlərinə müraciətdə “müstəqillik, demokratiya, dövlətçilik dəyərləri sistemində Məhəmməd Əmin Rəsulzadənin irsi” mövzusunda beynəlxalq konfransda iştirak edən dörd yüzdən çox iştirakçı Azərbaycan prezidentindən və Heydər Əliyev  Fondunun prezidentindən Bakıda Rəsulzadənin Ev Muzeyinin (Nizami küçəsi, 65) yaradılmasını şəxsi nəzarətə götürməyi və maliyyələşdirməyi xahiş edir. Rəsulzadənin ailəsi Avropaya miqrasiya etməzdən əvvəl bu ünvanda yaşayıb.

“M.Ə. Rəsulzadənin Ev Muzeyi” İctimai Qrupunun yaradıcısı və rəhbəri, tarix elmləri doktoru Solmaz Rüstəmova-Tohidi hesab edir ki, Ev Muzeyinin yaradılması məsələsi prezidentin iki il öncə türk və islam dünyasında ilk demokratik Azərbaycan Cümhuriyyətinin yaradılmasının 100 illik yubileyini qeyd edərkən qarşıya qoyduğu vəzifələr formatına daxildir və  xalqın dövlətlə birliyinin təzahürü olacaq.

Konfransın ilk günündə Türkiyə, İran, Niderland, Macarıstan, Rusiya, Gürcüstan, Ukrayna, İspaniya və digər ölkələrdəki Azərbaycan mühacir cəmiyyətlərinin nümayəndələri, Azərbaycan və Gürcüstanın mədəniyyət və elm xadimləri, 80-cı illərin sonu və 90-cı illərin əvvəllərində Azərbaycanın müstəqillik hərəkatını fəalları çıxış ediblər.

Çıxış edənlərin ümumi fikrini S.Rüstəmova Tohidi ifadə edib. O deyib ki,  müstəqil Azərbaycan Cümhuriyyətini yaratmış siyasi xadimin Bakıda Ev Muzeyinin olmaması ölkə adına yaraşmaz. Belə ki, Bakıda Nəriman Nərimanovun, Səməd Vurğunun və digər sovet xadimlərinin Ev muzeyləri var. “Bakının mərkəzində Rəsulzadəyə abidə ucaltmaq niyyətinin unudulması Azərbaycana yaraşmaz”, - o əlavə edib və xatırladıb ki,  AXC qurucusunun heykəli Eldar Ömərov tərəfindən yaradılıb və onun emalatxanasında saxlanılır.

Türkiyənin Azərbaycandakı səfiri Erkan Özoral M.Ə.Rəsulzadənin bütün türk dünyası üçün əhəmiyyətindən danışıb.

Rusiya diasporu Azərbaycan təşkilatlarının birinin nümayəndəsi (sədr Füzuli Məmmədov) Ev Muzeyin təmirinin maliyyələşdirilməsini öz üzərinə götürəcəyini vəd edib.

Digər diasporlar Rəsulzadənin Polşa, Almaniya və Türkiyədə yaşadığı dövrə dair eksponatları Ev Muzeyə verəcəklərini bildiriblər.

Fransadan olan gürcü alim Georgi Mamuliyanın çıxışında Azərbaycan, Gürcüstan və Şimali Qafqaz xalqlarının iştirakı ilə Zaqafqaziya Konfederasiyasının yaradılması ideyasının təbliğində M.Ə.Rəsulzadənin prinsipiallığı barədə məlumat verilib. “Ermənistan həmişə olduğu kimi bu cür təşəbbüslərdən yayınıb, - G.Mamuliya əlavə edib.

“Dədə Qorqud” Milli Fondunun rəhbəri Eldar İsmayılov M.Rəsulzadəni “millətin atası” adlandırıb,  rejissor Ramiz Həsənoğlu isə danışıb ki,  90-cı illərdə teatrın tərkibində Türkiyəyə qastrola gedərkən Ankaraya Rəsulzadənin məzarına  millətin atasının doğma kəndi Novxanıdan torpaq aparıb.

Tədbir hərəkatın gənc fəallarının çıxışı və AXC parlamenti sədrinin nəvəsi Rais Rəsulzadənin minnətdarlıq çıxışı ilə başa çatıb.

Konfransın ilk iclası “Park-Hayat” otelində keçirilib. Yanvarın 31-də Rəsulzadənin doğum günündə AMEA Tarix İnstitutunda ikinci yekun iclas keçiriləcək.--0--