Azərbaycanda daimi yaşayan və xaricə səfər etmiş xarici vətəndaşlar evlərinə qayıda bilmirlər

Bakı/17.03.20/Turan: Koronavirusla əlaqədar Azərbaycan sərhədlərinin xarici vətəndaşlar üçün bağlanması ölkədə daimi yaşayan başqa dövlətlərin vətəndaşlarını çətin vəziyyətə salıb. Azərbaycanda daimi əsaslarla əsasən Rusiya, İran, Gürcüstan və Türkiyə vətəndaşları yaşayır. Başqa ölkələrin bəzi vətəndaşları burada ailə qurublar, Azərbaycan dövlət təşkilatlarında kadrlı işçilərdir və hətta rəhbər vəzifələr tuturlar. Sərhədlərin xarici vətəndaşlar üçün bağlanması ilə əlaqədar onlar başqa ölkələrə səfər etdikdən sonra Azərbaycana qayıda bilmirlər.

Bu barədə Turan-a Azərbaycan Milli Elmlər Akademiyasının alimi bildirib. O, işini itirməkdən ehtiyatlandığı üçün adının açıqlanmasını istəməyib. Alim Rusiya vətəndaşıdır, Bakıda Azərbaycan vətəndaşı ilə ailə qurub, iki övladı var. Beynəlxalq konfransda iştirak etmək üçün Türkiyədə səfərdə olub. İstanbula gedərkən xarici vətəndaşların Azərbaycana səfərləri qadağan edilməmişdi, buna görə səfərlə bağlı problem görünmürdü.

2020-ci il martın 15-də İstanbul aeroportunda alimə Bakı reysinə aviabilet verməkdən imtina ediblər, baxmayaraq ki, o, əvvəlcədən ödəniş etmişdi. Bunu koronavirusla əlaqədar Azərbaycan və Türkiyə arasında üçüncü dövlətlərin vətəndaşlarının Azərbaycana səfərinin dayandırılması haqqında müvəqqəti sazişlə izah ediblər.

Azərbaycanın İstanbuldakı konsulu Azərbaycanda yaşayan Rusiya vətəndaşına - etnik azərbaycanlıya kömək etməkdən imtina edib. Onun köməyinə Rusiyanın İstanbuldakı konsulu yetişib, dəfələrlə sərinişinə zəng edərək onun vəziyyəti ilə maraqlanıb və Bakıya Rusiya hava məkanından getməyi məsləhət görüb. Alim İstanbuldan Moskvaya gedib oradan Bakıya qayıtmaqla evinə dönməyə müvəffəq olub. Məcburi olaraq planlaşdırılmamış iki aviasiya biletinin alınması ilə əlaqədar çəkdiyi xərci ona ödəməyəcəklər.

"Mənim Azərbaycandakı elmi fəaliyyətim respublikanın, onun elm məktəbinin şöhrət qazanmasına yönəlib. Başqa ölkələrdə Azərbaycan elmi adından çıxış edirəm, prezident İ.Əliyevin dünyada Qarabağ həqiqətləri haqqında məlumatların yayılmasının əhəmiyyəti haqqında tapşırığını yerinə yetirirəm. Amma biz çətin vəziyyətə düşdükdə bu ölkə bizə görə məsuliyyəti öz üzərinə götürmək istəmir. Niyə məmurlar başqa ölkələrin vətəndaşlarının Azərbaycana səfərinin qadağan edilməsi haqqında qərar qəbul edərkən uzun illərdir bu ölkədə yaşayan və işləyən, burada ailə qurmuş və daşınmaz əmlak almış xarici vətəndaşları düşünməyiblər? Onlar xaricdədirlərsə, hara getsinlər?", deyə elmlər doktoru Turan-a bildirib.

Onun sözlərinə görə, Türkiyə və Rusiya aeroportlarında koronavirusla əlaqədar məhdudiyyətlər səbəbindən Azərbaycana, öz ailələrinin yanına və işlərinə qayıda bilməyən onlarla Türkiyə, İran, Rusiya və Gürcüstan vətəndaşı çətin vəziyyətə düşüb.

Dövlət Statistika Komitəsinin məlumatına görə, 2018-ci ildə Azərbaycanda daimi yaşayış üçün 3, 2 min xarici vətəndaş gəlib. 2019-cu ildə Türkiyənin xarici siyasət idarəsi Azərbaycanda 55 min Türkiyə vətəndaşının daimi yaşadığını bildirib. 2010-cu il üçün olan məlumatlara görə, keçmiş SSRİ ölkələrindən Azərbaycana 125 minə yaxın əcnəbi gəlib. Azərbaycana gələnlərin ən böyük hissəsi Rusiyanın payına düşür - 53 min nəfər. Həmçinin, son 13 ildə Avropa, Asiya və Yaxın Şərq ölkələrindən Azərbaycana 1500-ə yaxın insan gəlib, deyə 2010-cu ildə "Bakinskiy raboçiy" qəzeti məlumat yayıb. -0-