�Azərbaycanda insan alverinə qarşı mübarizə üzrə potensialın artırılması� layihəsi təqdim olunub

Bakı/12.06.17/Turan: Bakıda Hyatt Regency otelində Avropa İttifaqının və Beynəlxalq Miqrasiya Təşkilatının Azərbaycandakı nümayəndəlikləri, Azərbaycan hökuməti "Azərbaycanda insan alverinə qarşı mübarizə üzrə potensialın artırılması" (ENCT) layihəsinin açılış mərasimini keçiriblər.

Mərasimdə Azərbaycanın xarici işlər nazirinin müavini Mahmud Məmmədquliyev, Daxili İşlər Nazirliyinin İnsan Alverinə qarşı Mübarizə Baş İdarəsinin rəisi Heydər Heydərov, Avropa İttifaqının Azərbaycandakı nümayəndəliyinin rəhbəri Malena Mard, Beynəlxalq Miqrasiya Təşkilatının Azərbaycandakı nümayəndəsi Serhan Aktoprak, Azərbaycanın rəsmi qurumlarının təmsilçiləri, ölkədə akreditə olunun diplomatik korpusların nümayəndələri, QHT rəhbərləri iştirak ediblər.

Layihə Avropa İttifaqının əsas və BMqT Beynəlxalq İnkişaf Fondunun müştərək dəstəyi ilə maliyyələşdirilir.

"Azərbaycanda insan alverinə qarşı mübarizə üzrə potensialların artırılması" layihəsi 2016-2018-ci illərdə icra olunacaq və insan alveri ilə mübarizədə Azərbaycan hökumətinə dəstək verilməsini hədəfləyir.

Azərbaycan xarici işlər nazirinin müavini Mahmud Məmmədquliyev bildirib ki, insan alveri ilə mübarizə Azərbaycan hökumətinin siyasətinin vacib prioritetlərindən biridir. Azərbaycan Xarici İşlər Nazirliyi bu layihənin həyata keçirilməsinə dəstək verməyə hazırdır.

"Bu layihə Azərbaycanla Avropa İttifaqı arasında imzalanmış yerdəyişmə sahəsində əməkdaşlığa təkan verəcək. Azərbaycan Avropa İttifaqı ilə əməkdaşlığın inlkişafında və dialoqun dərinləşməsində maraqlıdır", - o qeyd edib.

Nazir müavininin fikrincə, bu kimi layihələr ikitərəfli əməkdaşlığı genişləndirmək üçün böyük imkan açır.

Aİ-nin Azərbaycandakı nümayəndəliyinin rəhbəri Malena Mard qeyd edib ki, insan alverinə qarşı mübarizə Aİ-nin təhlükəsizlik və insan hüquqlarının qorunması sahəsində vacib prioritetlərindəndir.

"Təəssüf ki, bu sahədə son vaxtlar artım müşahidə edilir. Ona görə də bu sahədə əməkdaşlıq çox vacibdir".

Azərbaycan Daxili İşlər Nazirliyinin İnsan Alverinə qarşı Mübarizə Baş İdarəsinin rəisi Heydər Heydərov ölkədə insan alveri sahəsində statistikanı açıqlayaraq insan alveri cinayətlərinin ümumi cinayətlərin bir faizindən azını təşkil etdiyini söyləyib.

"Azərbaycanda il ərzində törədilən cinayətlərin bir faizdən azı insan alveri cinayətinin payına düşür. Məsələn, 2015-ci ildə 26916 cinayət işindən yalnız 128-i, 2016-cı ildə 26611 cinayət işindən yalnız 166-i insan alveri cinayətidir. 12 ildən artıq vaxtda 1078 cinayət işi araşdırılıb. Bu müddətdə 486 insan alverçisi, o cümlədən 100-dən çox mütəşəkkil dəstə, qrup məsuliyyətə cəlb olunub. 761 insan alveri qurbanı müəyyənləşdirilərək cəmiyyətə inteqrasiya edilib".

Beynəlxalq Miqrasiya Təşkilatının Azərbaycandakı nümayəndəsi Serhan Aktoprak insan alveri məsələsinin dünyada ən mühüm problemlərdəin biri olduğunu diqqətə çatdırıb.

"Miqrasiya problemləri tarixdə ən yüksək nöqtəsinə çatıb. Hazırda dünyada 250 milyon beynəlxalq miqrant, 750 milyon daxili miqrant var. Təkcə 2105-ci ildə 25 milyon qaçqın, 40 milyon daxili qaçqın olub.

"Miqrasiya prosesi inkişafa təkan verirsə də böyük problemləri də diqqətə gətirir. Mütəşəkkil cinayətkarlığın ən qəddar forması insan alveridir. Hər il 10 minlərlə insan qurbana çevrilir. 2015-ci ildə 78 000 insan qurbana çevrilib. Həqiqətdə isə bu rəqəm daha böyükdür", - o qeyd edib.

S.Aktoprak Azərbaycanın insan alveri sahəsində gördüyü işləri müsbət xarakterizə edib.

"Ümid edirik ki, bu layihə də uğurla icra olunacaq və başqa ölkələr üçün model olacaq", - Beynəlxalq Miqrasiya Təşkilatının Azərbaycandakı nümayəndəsi Serhan Aktoprak bildirib.

Sonda BMqT-nin Azərbaycandakı nümayəndəliyinin miqrantlara yardım bölməsinin rəhbəri Şaren Tuladhar layihəni təqdim edib.-03C-