Azərbaycandan həcc ziyarəti Moskva ilə müqayisədə 20% bahadır

Qafqaz Müsəlmanları İdarəsi (QMİ) 2024-cü ildə həcc ziyarətinin 7-20 iyun tarixləri arasında həyata keçiriləcəyini açıqlayıb. Ziyarətə getmək istəyən zəvvarlar QMİ-yə pasport, şəxsiyyət vəsiqəsinin surəti, 3.5x4.5 sm ölçüdə ağ fonda çəkilmiş 3 ədəd rəngli fotoşəkil (qadınlar tünd hicabda) və sağlamlıq haqqında arayış təqdim etməlidirlər. Sənəd qəbulu fevralın 12-dən etibarən iş günləri saat 10.00-dan 16.00-a qədər QMİ-nin Mirzə Fətəli küçəsi, 7 ünvanında yerləşən binasında həyata keçiriləcək.

Bu il bir nəfərlik həcc paketinin qiyməti 5850 ABŞ dolları təşkil edir, bu, keçən illə müqayisədə 100 dollar çoxdur. Zəvvarlar AZAL dövlət şirkətinin təyyarələri ilə həccə gedəcəklər.

Bu il Azərbaycandan olan zəvvarlar üçün 2000 nəfərlik yer ayrılıb.

Maraqlıdır ki, Moskvadan (Məkkədən Bakıya nisbətən 2 min km uzaq) həccə gediş daha ucuzdur. Belə ki, Məkkədə qidalanma daxil olmaqla, təyyarə+avtobusla səfər 4300 dollar, qidalanma daxil olmaqla, Məkkəyə qədər təyyarə ilə gediş isə 5000 dollar təşkil edir.