Azərbaycanın dağlıq rayonlarına qar yağıb

Bakı/01.12.22/Turan: Azərbaycan ərazisində qeyri-sabit hava şəraiti davam edir. Bəzi yerlərdə yağış, dağlıq rayonlarda isə qar yağır. Lənkəran-Astara bölgəsində yağıntılar intensiv xarakter daşıyır, bu barədə Milli Hidrometeorologiya Xidmətinin dekabrın 1-də yaydığı məlumatda deyilir.

Qar örtüyünün hündürlüyü Altıağacda 9, Şahdağda 3, Qrız, Xaltan, Qusar, Qaxda 2 santimetr, Qobustan, Quba, Şəki, Göygöldə 1 santimetr təşkil edib.

Düşən yağıntının miqdarı Lənkəranda 26, Lerikdə 25, Astarada 19, Göytəpədə 11, Qəbələdə 10, Şahbuz, Yardımlı, Neftçala, Beyləqan, Oğuzda 9, Ağdərə, Şəki, İmişli, Salyan, Biləsuvarda 8 millimetrədək olub.

Bakı və Abşeron yarımadasına 8 mm yağıntı düşüb. Cümə axşamı ölkədə yağıntılı hava şəraiti davam edəcək.

2-5 dekabr tarixlərində yağıntı gözlənilmir. Cümə günü Bakıda və Abşeronda hava buludlu olacaq, havanın temperaturu gündüz 7-9 dərəcə isti təşkil edəcək.

Azərbaycanın rayonlarında da havanın əsasən yağmursuz keçəcəyi gözlənilir. Amma gecə və səhər bəzi yerlərdə yağış yağacağı, duman olacağı gözlənilir. Mülayim şərq küləyi üstünlük təşkil edəcək.

Havanın temperaturu aran rayonlarında gecə 3-7 dərəcə, gündüz 7-11 dərəcə isti, dağlarda gecə 3-7 dərəcə şaxta, gündüz 0-3 dərəcə isti təşkil edəcək. 06В