Azərbaycanlılar yəqin ki, Türkiyə-Çin peyvəndilə pulsuz peyvəndlənəcək

Bakı/24.12.20/Turan: Azərbaycanda pandemiyaya qarşı mübarizəyə cavabdeh olan TƏBİB dövlət təşkilatı Turan ilə söhbətdə Bakının Türkiyə peyvəndlərini almaq niyyəti barədə yayılan məlumatları təsdiqləməyib.

Azərbaycan hökuməti Türkiyədən 4 milyon ədəd koronavirus əleyhinə vaksin almaq qərarına gəlib. Bu barədə “Report” hökumət mənbələrinə istinadən məlumat verib.

Məlumata görə, vaksin Türkiyənin “Keymenİlaç” şirkətindən alınacaq. Partiyanın dəyəri 80 mln. təşkil edəcək. Hökumətin qərarına əsasən vəsaitlərin bir hissəsi koronavirusla mübarizəyə Dəstək Fondu, digər hissəsi isə Maliyyə Nazirliyi tərəfindən ödəniləcək. İlkin mərhələdə “Keymenİlaç” ümumi məbləğin 50% - ni alacaq, - “Report” bildirib.

Lakin TƏBİB-in nümayəndəsi Elnarə Baxşıyeva Turan-a bildirib ki, hələlik onların Türkiyə və ya digər ölkədən peyvənd alınması planları barədə məlumatları yoxdur.

Turan-ın əldə etdiyi digər səhih məlumata görə, antikoronavirus peyvəndinin dövlət satınalması məsələsilə Azərbaycan Maliyyə Nazirliyi məşğul olur. Odur ki, TƏBİB “Keymenİlaç” ilə əldə olunmuş razılaşmadan xəbərsiz ola bilər.

"Türkiyə versiyası" gözlənilməzliklərlə doludur. 2020-ci il aprelin əvvəlində türkiyəli mütəxəssislər heyvanların üzərində vaksini uğurla sınaqdan keçiriblər. Noyabrın əvvəlində ölkə prezidenti Rəcəb Tayyip Ərdoğan bildirib ki, 2021-ci ilin yazına Türkiyənin öz peyvəndi ola bilər. İlin sonunadək Türkiyədə digər ölkələr tərəfindən hazırlanmış bir və ya bir neçə vaksindən istifadə edilə bilər. Məlumdur ki, Türkiyə hökuməti danışıqlar aparıb və Çin istehsalı olan preparatla pulsuz peyvəndləmə aparmaq niyyətindədir.

Azərbaycan 2021-ci ilin əvvəlində COVİD-19-dan könüllü vaksinasiyaya başlayacaq. Bunu prezidenti İlham Əliyev bildirib. "Vaksinasiya proqramına gələn ilin əvvəlində başlanacağı planlaşdırılır. O, könüllü olacaq və dövlətin hesabına həyata keçiriləcək”, - İ.Əliyev cümə günü MDB dövlət başçılarının sammitində bildirib, “İnterfaks” məlumat yayıb.

Prezident həmçinin qeyd edib ki, Azərbaycan bu məsələ ilə bağlı vaksinasiya strategiyasını işləyib hazırlayıb. "Bu, çoxplatformalığı nəzərdə tutur və hansı texnologiyalardan istifadə ediləcəyindən asılı olmayaraq, bizim üçün əsas meyar həmin vaksinlərin elmi cəhətdən əsaslandırılmış təhlükəsizliyi olacaq”, - o vurğulayıb.

"Hazırda dünyada peyvənd prosesi başladığı vaxtda biz də bu prosesə qoşuluruq. Ötən aylar ərzində “Sputnik-V”, “AstraZeneca”, “Sinopharm”, “Sinovac”, “Moderna”, “Pfizer”, “BioNTech” kimi aparıcı vaksin istehsalçıları ilə danışıqlar aparılıb və onu da qeyd etmək istəyirəm ki, Azərbaycan ölkələrin vaksinlərə ədalətli çatımı üzrə ÜST-ün iştirakı ilə beynəlxalq Covax təşəbbüsünə qoşulan ilk ölkələrdən biridir”, - İ.Əliyev qeyd edib.  

Prezidentin sadaladığı şirkətlər Rusiya, İngiltərə-İsveç, Çin( 2 şirkət), Almaniya və ABŞ (2 şirkət) fəaliyyət göstərir. Onların arasında Türkiyə şirkəti yoxdur. Deməli, İlham Əliyev MDB dövlət başçılarının sammitində çıxış etdiyi vaxt Türkiyə peyvəndi ilə bağlı variant nəzərdə tutulmamışdı.

Niyə gözlənilmədən Bakının seçimi Türkiyənin “Keymenİlaç” şirkəti oldu ? Adının çəkilməsini istəməyən iki mənbə Turan-a bildirib ki, yuxarıda sadalanan əczaçılıq şirkətləri yerli tələbatı tam təmin etdikdən sonra öz məhsullarını xaricə satmağa hazırdırlar. Deməli, Azərbaycan Rusiyanın da daxil olmaqla, bu vaksinləri 2021-ci ilin yaz-yayına qədər ala bilərdi. Ancaq vaxt gedir, ölkədə hər gün koronavirusdan 40-50 nəfər ölür. Ona görə də Türkiyədən vaksin almağa qərar verilib.

"Çinin “Sinovac” peyvəndini alacağıq, ancaq bu şirkətin Türkiyə nümayəndəliyindən. Peyvəndin sınaqları Türkiyə Səhiyyə Nazirliyinin laboratoriyalarında aparılır".

"Türkiyə Çinin  “Sinovac” peyvəndini alır. Bu peyvəndin kliniki sınaqlarının son fazası, o cümlədən Türkiyədə də  aparılıb. Dekabrın 23-də sınaq nəticələrinin və effektivlik dərəcəsinin rəsmi açıqlanması nəzərdə tutulsa da şirkət 3 ölkədən- Braziliya, İndoneziya və Türkiyədən məlumatları təhlil etməyə imkan tapmayıb. Proses təxminən 2 həftə çəkəcək”, - iki ekspert Turan-a bildirib. 0—