Bakı aeroportunda gömrüyün “xüsusi əməliyyatı”

Bakı/24.03.23/Turan:  Martın 23-də ayıq-sayıq gömrükçülər Bakı hava limanında böyük "qaçaqmalçılıq" partiyasının aşkarlandığını bildiriblər. Dövlət Gömrük Komitəsinin saytındakı məlumatda deyilir ki, "gömrükdə bəyan edilməmiş brend geyim əşyaları aşkar edilib" (!)

Sonra gömrük bu "xüsusi əməliyyat"ın təfərrüatlarını açıqlayır: “Hava Nəqliyyatında Baş Gömrük İdarəsinin Əməliyyat və Təhqiqat İdarəsinə daxil olan məlumat əsasında İstanbul-Bakı aviareysi ilə gələn Azərbaycan Respublikası vətəndaşı Heydər Əliyev Beynəlxalq Hava Limanının CİP zalından gömrük nəzarət zonasını tərk etmək istəyərkən ona məxsus əl yükləri gömrük yoxlamasına cəlb edilib.

(Bu frazadan belə düşünmək olar ki, digər sərnişinlər orada gecələmək üçün qalır. Bundan əlavə, Bakı hava limanında CIP zalı yoxdur).

“Yoxlama zamanı əl yüklərindən gömrük orqanına şifahi, yazılı və ya elektron qaydada bəyan edilməyən xeyli miqdarda müxtəlif markalı brend geyim əşyaları, 1 ədəd “Cartier” markalı qol saatı, 175 qram zərgərlik məmulatları və digər mallar aşkar olunub. Faktla bağlı araşdırma aparılır”.

Gömrük işçilərinin "uğurunu" nümayiş etdirmək üçün saytda gömrüyün qaçaqmalçılıq hesab etdiyi malların fotoşəkilləri dərc olunur.

Məlumatda açıqlanmır ki, göstərilən başmaqları, idman ayaqqabılarını, mayka və digər əşyaları niyə gətirmək olmaz. Dəqiq nəyin araşdırıldığı da aydın deyil, qanunvericiliyin pozulması faktı varmı? Əgər varsa, hansı qanunvericilik?

"Bəyan edilməmiş brend əşyalar aşkarlandı" məlumatının özü savadsız və gülünc görünür. Nə vaxtdan brend əşyaları bəyan etmək lazım gəlib?

Məgər gömrükdə bilmirlər ki, bu "brend" başmaqlar və idman ayaqqabıları İstanbulda küçədə, hər addımbaşı gülünc qiymətə satılır. -02D-