Bakı meriyası köşklərlə bağlı məhkəmə işinə məhəl qoymayıb

Cümə günü 1 saylı Bakı İnzibati-İqtisad Məhkəməsində Vüsalə Baxışovanın sədrliyi ilə Turan İnformasiya Agentliyinin Bakı Şəhər İcra Hakimiyyətinə qarşı iddiası üzrə ikinci məhkəmə iclası keçirilib.

İddia “İnformasiyanın əldə olunması haqqında” qanunun 24.1-maddəsinə uyğun olaraq şəhər rəhbəri Hacıbala Abutalıbovun paytaxtda yeni köşklərin qurulmasına dair məlumatın verilməsindən imtina etməsi ilə əlaqədar verilib.

H.Abutalıbova ünvanlanan 28 avqust tarixli məktubda yeni köşklərin qurulmasının qanuni-normativ tərəfləri, onları hüquqi sahibləri, təyinatı üzrə istifadə olunmamasının səbəbləri, bunun nəticəsində çap nəşrlərinə dəyən zərər haqda suallara cavab  verilməsi xahiş olunurdu.

Cavabdeh məhkəmə iclasına məhəl qoymayıb və bu barədə məhkəməni məlumatlandırmayıb. Ötən iclasda meriyanın Ticarət və Xidmət Departamentinin nümayəndəsi məktubda göstərilən suallara cavab verə bilməyib.

Bundan əlavə, köşklərin qurulması ilə bağlı Bakı Şəhər İcra Hakimiyyətinin məhkəməyə təqdim olunmuş 2011-ci il 28 oktyabr tarixli 521 saylı sərəncamı “Qasid” yayım firmasına məxsus qəzet köşklərinin dəyişdirilməsinin qanunsuz olduğunu göstərib.

İndiki iclasda V.Baxışova ən çox Turan agentliyinin meriyaya sorğusunun ictimai marağa cavab verib-vermədiyini və cavabdehin qarşıya qoyulan sualları cavablandırmalı olub-olmamasını araşdırmağa çalışırdı. O, buna inandırıcı cavab alıb ki, bu da ondan ibarətdir ki, məlumatın KÜTLƏVİ informasiya vasitələri tərəfindən CƏMİYYƏTİN  geniş təbəqəsinə təqdim olunması və İCTİMAYƏTİN azad informasiya almaq hüququ böyük İCTİMAYI əhəmiyyət daşıyır. Və köşklərlə bağlı halda İCTİMAYI  maraqlar ciddi şəkildə pozulub.

Vəkil Zibeydə Sadıqova (Media Hüququ İnstitutu) hakimdən xahiş edib ki, ictimai maraqları  müdafiə edən iddiaçının maraqlarını qorusun, cavabdehin müdafiəçisi rolunda çıxış etməsin.

Məhkəmə problemin ictimai önəmi ilə bağlı məsələyə aydınlıq gətirdikdən sonra V.Baxışova növbəti iclası yanvarın 23-nə saat 15:40-a təyin edib.

Məhkəmə iclasının gedişini bəzi səfirliklərin və ATƏT missiyasının nümayəndələri müşahidə ediblər.

Məlum olduğu kimi, jurnalistlərin keçirdikləri monitorinqlər göstərir ki, yeni köşklərdə qəzet, xüsusilə müstəqil və müxalifət qəzetlərinin satışı süni şəkildə azaldılır. Bəzi köşklərdə dövrü mətbuat demək olar ki, satılmır, lakin qida məhsulları, içkilər, siqaretlər satılır. Bütün bunlar qəzetlərin tirajının azaldılmasına, naşirlərin və oxucuların hüquqlarının pozulmasına gətirib çıxarıb.—0—