FHN qazanxanada partlayışın nəticələri haqqında məlumat yayıb (yenilənib)

İlkin məlumata görə, Bakı şəhəri, Nizami rayonu, 8-ci köndələn küçəsində qazanxanada partlayış qaz sızması nəticəsində baş verib, xəbəri Azərbaycan FHN yayıb.

Ümumi sahəsi 40kv.m. olan qazanxanada partlayış yanğına səbəb olmayıb.

 Partlayış nəticəsində qazanxana binası və ərazidə sahəsi 240kv.m. olan tikilinin konstruksiyaları dağılıb, yaxınlıqdakı dördmərtəbəli binanın pəncərə şüşələri qırılıb, 3 avtomobilə ziyan dəyib. Hadisə nəticəsində xəsarət almış 6 nəfər müvafiq tibb müəssisələrinə yerləşdirilib.

Hadisə ilə əlaqədar müvafiq qurumlar tərəfindən araşdırma aparılır.

* * *

Bakıda qazanxanada partlayış nəticəsində altı nəfər xəsarət alıb

Oktyabrın 7-də saat 13:50 radələrində TƏBİB-ə (Tibbi Ərazi Bölmələrini İdarəetmə Birliyi) 8-ci Köndələn küçəsində yerləşən qazanxanada partlayış haqqında məlumat daxil olub. 

Hadisə yerinə 4 "təcili yardım" briqadası gəlib.

Altı nəfər xəsarət alıb, 3 kişi və 2 qadın TƏBİB-in tabeliyində olan xəstəxanaya yerləşdirilib.

Onlardan birinin vəziyyəti kritik, ikisinin vəziyyəti orta-ağır, 2-sinin vəziyyəti isə qənaətbəxş qiymətləndirilir.

Hazırda diaqnostik müayinələr aparılır.

Təcili tibbi yardım briqadaları tərəfindən 2 qadına nevrotik reaksiya diaqnozu ilə yerində yardım göstərilib.

Kəsilmiş yara diaqnozu təyin edilən 39 yaşlı qadın isə ilkin yardımdan sonra xəstəxanaya yerləşdirilməkdən imtina edib.