Baş Prokurorluqda Gəncə hadisələri müzakirə olunub

Bakı/31.07.19/Turan: İyulun 31-də Baş Prokurorluqda müşavirə zamanı 2018-ci ilin iyulunda Gəncədə baş vermiş hadisələr - şəhərin başçısı Elmar Vəliyevə sui-qəsd və bunun ardınca baş verən iğtişaşlar müzakirə olunub.

Baş prokuror Zakir Qaralov çıxışında bildirib ki, 3 iyul 2018-ci il tarixində Gəncədə Yunis Səfərov və digər radikal dindar şəxslərin terror aktları, öldürməyə, hakimiyyəti zorla ələ keçirməyə cəhdi və digər cinayətləri ilə bağlı açılmış cinayət işi çərçivəsində mütəşəkkil cinayətkar qrupun 29 üzvü cəlb edilib, daha 11 nəfər barəsində beynəlxalq axtarış elan edilib.

Bundan başqa, 2018-ci il iyulun 10-da zorakılıq aktları, kütləvi iğtişaşlar törətmiş, iki polisi qətlə yetirmiş radikal dindar qruplara qarşı açılmış cinayət işinin təhqiqatı 61 nəfərin həbsinə gətirib çıxarıb.

Ümumilikdə 2018-ci ilin noyabrından 60 nəfər barəsində 8 cinayət işi yekunlaşıb və məhkələrə göndərilib. Təqsirləndirilən şəxslər müxtəlif müddətli azadlıqdan məhrumetmə cəzalarına məhkum ediliblər.

Bir neçə digər cinayət işi üzrə məhkəmələr davam edir.

Bütünlükdə cinayətkarlığa qarşı mübarizə haqqında danışan Qaralov prokurorluq orqanlarının uğurlarını qeyd edib və öz əməkdaşlarını korrupsiyaya qarşı mübarizənin gücləndirilməsi üzrə tədbirlər görməyə çağırıb. Eyni zamanda, o, öz işlərində müasir texnologiyalardan istifadə etmək zərurətini qeyd edib.

* Xatırladaq ki, 2018-ci il iyulun 3-də Gəncə şəhər icra hakimiyyətinin başçısı Elmar Vəliyev və onun mühafizəçisi tapança ilə silahlanmış Yunis Səfərovun hücumuna məruz qalıb. Hər ikisi sağ qalıb, hücum terror aktı kimi qiymətləndirilib.

Hüquq-mühafizə orqanları baş verənləri Azərbaycanda islam dövləti yaradılması məqsədilə hakimiyyəti ələ keçirmək cəhdi kimi qiymətləndirməyə tələsiblər.

Bundan qısa müddət sonra sosial şəbəkələrdə iyulun 10-da Səfərovu müdafiə etmək üçün mitinqə çıxmaq çağırışları yayılıb. Rəsmi versiyaya görə, mitinqin dağılması zamanı etirazçılar iki polis zabitini öldürmüşlər.-21D-