Basta.info-nun redaktoruna qarşı cinayət ittihamı irəli sürülüb

Bakı/30.11.18/Turan: Bastainfo.com saytının baş redaktoru Mustafa Hacıbəyli bu gün şahid qismində keçdiyi cinayət işi ilə əlaqədar Bakı Şəhər Prokurorluğuna çağırılıb. Lakin bu gün o, təqsirləndirilən şəxs statusuna keçirilib. Xüsusən, ona qarşı CM-in 281.2 (dövlət əleyhinə çağırışlar), 309.2 (vəzifə səlahiyyətlərini aşma) və 313-cü (vəzifə saxtakarlığı) maddələri ilə ittiham irəli sürülüb.

"İttihama əsasən, guya mən dövlət əleyhinə çağırışlar etmişəm, ictimaiyyəti qəsdən yanıltmışam və yalan məlumatlar yaymışam", deyə Hacıbəyli Turan-ın müxbiri ilə söhbətində bildirib.

Redaktor barəsində polis nəzarətinə verilmə qətimkan tədbiri seçilib. Həftədə iki dəfə o, yaşayış yeri üzrə sahə polisinə gedib qeyd edilməlidir. Hacıbəyli bütün ittihamları təkzib edib, yaxın günlərdə işin məhkəməyə göndəriləcəyini qeyd edib.

Elə bu gün criminalaz.com saytının redaktoru Anar Məmmədova qarşı bənzər ittihamlar irəli sürülüb. Onun barəsində də polis nzəarətinə verilmə qətimkan tədbiri seçilib.

Mustafa Hacıbəyli Azərbaycanın görkəmli müxalif jurnalistlərindən biridir. O, 20 ildən çox müxtəlif Azərbaycan KİV-lərində işləyib. O, həmçinin Müsavat partiyasının sədri Arif Hacılının qardaşıdır.

Xatırladaq ki, iyulun 9-da Baş Prokurorluq Gəncə icra başçısı Elmar Vəliyevə qarşı sui-qəsd və demək olar ki, bütün Azərbaycanın enerji təchizatından məhrum olmasına səbəb olmuş Mingəçevirdə enerji böhranı ilə əlaqədar İnternet-resurslarda "yalan məlumatların" və "qanunsuz çağırışların" yayılması haqqında cinayət işi açıb.

Bundan sonra prokurorluq bastainfo.com, criminalaz.com, topxeber.az və fia.az saytlarının bloklanması üçün Rabitə Nazirliyinə müraciət edib. -05B06-