Bayılda evləri orada yaşayan insanlarla birlikdə yıxırlar

"Bakının Xətai, Suraxanı, Nizami, Nəsimi, Nərimanov, Yasamal, Səbail, Pirallahı və Xəzər rayonlarında sosial-iqtisadi inkişafın sürətləndirilməsi üzrə əlavə tədbirlər haqqında" 2016-cı il tarixli hökumət fərmanı Bayıl yaşayış massivində Qurban Abbasov küçəsi sakinlərinin faciəsinə səbəb olub.

"Şəhərin başqa rayonlarında inşaatçılar sakinlərlə razılıq əldə edir, onlara yeni evin tikinti müddəti üçün kirayə pulu ödəyir və gələcək binada mənzillə təmin etmək öhdəliyi götürür. Bizim məhəllədə isə Dönüş-1 MMC inşaat şirkəti evləri içindəki insanlarla birlikdə yıxır", deyə Karina Əliyeva Turan-a bildirib.

62 yaşlı pedaqoq Q.Abbasov, 42 ünvanında ona məxsus birmərtəbəli evdən qaçmağa müvəffəq olub. Mebel, çılçıraqlar və evdəki digər əşyalar dağıntılar altında qalıb. Kondisioneri və digər məişət əşyalarını Dönüş-1-in işçiləri daşıyıb aparıblar, daha doğrusu, oğurlayıblar.

Bu küçədə evlərin sökülməsi və işçilərin Bakılıların məişət əşyalarını oğurlaması ilə bağlı videoreportaja burada baxmaq olar.

14 mənzilin sakinləri Baş Prokurorluğa, Prezident Administrasiyasına, birinci vitse-prezidentə və s. şikayətlər göndərirlər, onlara bir-birinə bənzər cavablar gəlir: Şikayətlər "araşdırmaq və məruzə etmək" tapşırığı ilə başqa instansiyalara göndərilir və ya vətəndaşlara məhkəməyə müraciət etmək məsləhət görülür. K.Əliyeva vəkil tutub, o, məhkəməyə iddia göndərib. Məhkəmə iclasının günü təyin edilməyib.

Nə qədər ki, rəsmi orqanlarla yazışma davam edir, biznesmen Əli Həsənova məxsus olan Dönüş-1 şirkəti Bakılıların evlərini sökür. 90-cı illərin sonlarında Ə.Həsənov bu məhəllədə bir çox birmərtəbəli evi alıb. Onun fəaliyyət taktikası belədir: əvvəlcə ekskavatorlar Həsənova məxsus /qeyri-yaşayış evlərini sökür. Eyni zamanda qonşuların kommunal kommunikasiyaları məhv edilir, sakinlərin olduğu qonşu evlərin damlarına və divarlarına ziyan vurulur. Həsənov onların sakinlərinə Bakının uzaq rayonlarında yerləşən çoxmərtəbəli binalarda, bəzən təmirsiz, pəncərəsiz və qapısız mənzillərə köçmək barədə lazımsız sazişlər təklif edir. Sakinlər müqavimət göstərsə, onların evi sakinləri ilə birlikdə və həmişə cümə günü gecə sökülür - şənbə və bazar günü sakinlər dövlət qurumlarına şikayətlə müraciət edə bilməməsi üçün, - deyə Karina Əliyeva izah edib.

O və qızı dekabrın 12-də evsiz qalıb. Gecə, qışın soyuğunda küçədə qalan Əliyevalar dörd gün qohumlarının yanında qalıblar, indi isə kirayə mənzil tuturlar. Ə.Həsənov və ya yerli hakimiyyətdən kimsə onlarla əlaqə saxlayır, kompensasiya və yeni mənzil haqqında söhbət belə getmir. Əli Həəsnov vətəndaşlara cavab verir: "burada dövlət də mənəm, prokurorluq da. Haraya istəyirsiniz, şikayət edin".

Sakinlər vətəndaşların daşınmaz əmlakın toxunulmazlığı hüquqlarını pozan Səbail rayon icra hakimiyyətinin rəhbəri Eldar Əzizovu və onun müavini Abid Əliyevi ittiham edirlər. Hökumətin köhnə mənzillərin sökülməsi haqqında fərmanında ("pilot layihələr") dəqiq deyilir ki, köhnə evlərin sökülməsi yalnız kompensasiya və köçmə haqqında könüllü razılıq əldə edildikdən sonra mümkündür, amma sakinlər məcburi qaydada qovulur. İnşaatçı Əli Həsənov öz şirkətinin sənədlərini sakinlərə göstərmir, Bakılılar isə boş sözlərə inanmır, evsiz qalmaqdan qorxurlar. Dövlət tərəfindən vətəndaşların maraqlarını müdafiə etmək üçün qoyulan icra hakimiyyəti susqun şəkildə baş verənləri izləyərək, faktiki olaraq biznesmen Ə.Həsənova hamilik edir.

Sakinlərə kömək etmək istəyən yalnız evləri dağıdan ekskavatorun təknəsini və dağıntılar arasında vurnuxan işçiləri kameraya çəkən jurnalistlərdir. Evlərdə insanlar yaşamağa davam edir, bəzi ailələrdə yaşlı və xəstə sakinlər var, yanvar gecəsində onları heç yerə aparmaq olmaz. Polis kənarda durub baş verənləri izləyir. Prezidentin vətəndaşların mənzil təminatının yaxşılaşdırılması haqqında qayğısı, bax, belə həyata keçirilir.

Turan İnformasiya Agentliyinin jurnalisti Səbail rayon İH-nin ümumi şöbəsinə zəng edib, oradan təsərrüfat və ya informasiya şöbələrinə zəng etməyi tövsiyə ediblər. Amma bu şöbələrdə zənglərə cavab verilmir. Ümumi şöbədə hamının "tədbirdə" olduğunu, bu gün hesabat günü olduğunu bildirir, buna görə bir qədər sonra zəng etməyi məsləhət görürlər. "Bir qədər sonra" isə yenə telefonlara cavab verən olmayıb.