Bayram Məmmədov: «Biz Heydər Əliyev bütünü dağıtdıq» (YENİLƏNİB)

Gənc fəal Bayram Məmmədovun barəsində hökmdən Apellyasiya Məhkəməsinə şikayət veriləcək. Bunu Turan-a vəkil Elçin Sadıqov bildirib.

Xatırladaq ki, bu gün məhkəmə külli miqdarda narkotik maddənin qanunsuz dövriyyəsi ittihamı ilə B.Məmmədovu 10 il azadlıqdan məhrum edib.

Hökmdən öncə vəkil və B.Məmmədovun yekun çıxışları olub.

Vəkil E.Sadıqov deyib ki, “uydurma və siyasi motivli iş” üzrə daha bir məhkəmə başa çatır. Bayram Məmmədov heç bir cinayət törətməyib. O, ancaq qanunsuzluğa və özbaşınalığa etiraz olaraq Heydər Əliyevin abidəsini yazıb”, - vəkil bildirib.

B.Məmmədovdan tələb ediblər ki, abidənin önündə üzr istəsin və peşman olması ilə bağlı televiziyada çıxış etsin. “Əgər bunu etsəydi, məhkəmə  olmazdı”, - vəkil vurğulayıb.

Müttəhim özü bildirib ki, ona işgəncə verərək abidənin önündə üzr istəməsini tələb ediblər. “Mən fanatik azadlıq aşiqiyəm. Azərbaycanda “vətənpərvərlik”lə bağlı yalnış fikir formalaşıb ki, bu da özünü Heydər və İlham Əliyevlərə xidmətdə göstərir. Ancaq vətənpərvərlik Heydər Əliyev aeroportu, Heydər Əliyev prospekti, Heydər Əliyev Fondu deyil. Əgər bunlar vətənpərvərlikdirsə, mən vətən xainiyəm”, - B.Məmmədov vurğulayıb.

Hakim Eynulla Vəliyev müttəhimin sözünü kəsmək istəyib, ancaq baş tutmayıb.

AXCP lideri Əli Kərimli hiddətlənərək məhkəməni müttəhimin sərbəst çıxışına imkan yaratmağa çağırıb.

Müsavat Partiyasının keçmiş rəhbəri İsa Qəmbər rişxəndlə deyib ki, “bundansa hakim son sözdən imtina etsəydi daha yaxşı olardı”.

Sonra müttəhim deyib: “Biz sübut etdik ki, Heydər Əliyev büt deyil. Biz bu bütü dağıtdıq. Biz öz əqidəmizə görə həbsə gedirik. Bundan sonra 10 may Heydər Əliyevin doğum günü kimi yox, onun abidəsinin üzərində “qul bayramı”nın yazıldığı gün kimi qeyd olunacaq. Mən peşman deyiləm”, - B.Məmmədov bildirib.

Hakim yenidən onun sözünü kəsib. Məhkəmə məşvərətə gedib. B.Məmmədovun əllərini dərhal qandallayıblar.

Hökm oxunan zaman B.Məmmədov arxasını məhkəməyə çevirib. Bu zaman zal onu alqışlayıb. İclasdan sonra əlliyə yaxın fəal məhkəmənin binası önündə “Bayrama və Qiyasa azadlıq” şüarını səsləndirib.—06D--

2016 Dekabr 08 (Cümə axşamı) 16:21:41

Cümə axşamı Bakı Ağır Cinayətlər Məhkəməsinin qərarı ilə NİDA Hərəkatının fəalı Bayram Məmmədov 10 il azadlıqdan məhrum edilib.

B.Məmmədov və Q.İbrahimov Heydər Əliyevin abidəsiü zərind siaysi şüarlar yazdlqdan sonra həbs olunublar. Lakin onlar külli miqdarda narkotik maddənin qanunsuz dövriyyəsində ittiham olunublar.

Amnesty International onları “vicdan məhbusları” kimi tanıyıb. Bundan öncə G.İbrahimov 10 il həbs cəzası alıb.—16D--