Beynəlxalq Bankla bağlı yeni həbslər

Hüquq-mühafizə orqanları Beynəlxalq Bankla bağlı kredit qalmaqalına görə  daha bir qrup şəxsin həbsə alındığını bildirir.

Beynəlxalq Bankdan yüksək məbləğdə kredit götürərək qaytarmayanların sırasında  bankın sabiq məsul vəzifəli əməkdaşları və iş adamları var.

Beynəlxalq Bankın Mərkəzi filialının keçmiş direktoru İlqar Abdullayev, bankın Nəqliyyat filialının keçmiş direktoru Kənan Orucov, bankın inzibati binalarının mühafizəsini icra edən “İnter Security” MMC-nin baş direktoru İbrahim Hüseynov, “Azərinşaatservis” MMC-nin Müşahidə Şurasının sədri Arif Həsənov, “Azərinşaatservis” MMC-nin təsisçisi olduğu “Trek İnvest” SC-nin direktor əvəzi Əli Əlişov və “İnter Glass” ASC-nin direktoru Fariz Muradov həbs olunanlar sırasındadır.

Mənbələr Beynəlxalq Bankın vəsaitlərini mənimsəməkdə şübhəli bilinən şəxslərə qarşı da müvafiq tədbirlərin görülməsinin bundan sonra da davam etdiriləcəyini bildiriblər.

Bu həbslərlə bağlı hüquq-mühafizə oqranlarının birgə açıqlama ilə çıxış etməsi nəzərdə tutulur.

Xatırladaq ki, 2015-ci ilin aprelində Beynəlxalq Bankda rəhbərlik dəyişdirilib. Bu dəyişikliklərdən sonra, may ayından etibarən banka kredit borcu olan iş adamlarının, habelə vaxtilə bankda çalışmış şəxslərin həbslərinə start verilib. --