Beynəlxalq Vəkillər Komissiyası Elçin Sadıqovu müdafiə edir

Bakı/12.03.19/Turan: Beynəlxalq Vəkillər Komissiyası (International Commission of Jurists - İCJ) Azərbaycan Vəkillər Kollegiyasını hüquqşünas Elçin Sadıqovun cəzasını ləğv etməyə çağırıb.

İCJ fevralın 25-də Azərbaycan Vəkillər Kollegiyasının Rəyasət Heyəti tərəfindən Sadıqov barəsində hökm çıxarılması ilə bağlı narahatlığını dilə gətirib.

Hökmün səbəbi Azərbaycan Baş Prokurorluğunun hələ 2018-ci ilin sentyabrında verilmiş şikayətidir.

Həmin vaxt Baş Prokurorluq Sadıqovu Yunis Səfərovun (Gəncə icra başçısı Elmar Vəliyevə qarşı sui-qəsddə ittiham olunurdu) müdafiəsindən kənarlaşdırıb, vəkili "yalan ifadə" verməsi üçün Səfərova "psixoloji təsir göstərməkdə" ittiham edib.

"Vəkilin peşə etikasına və öhdəliklərinə uyğun şəkildə atdığı addımlara görə məsuliyyətə cəlb edilməsi haqqında qərar vəkillərin müstəqilliyini və onların insan hüquqlarını müdafiə etmək qabiliyyətini təhlükə altına qoyur və Azərbaycanda vəkillərin öhdəliklərini müstəqil şəkildə yerinə yetirməsinə məhvedici təsir göstərə bilər", deyə İCJ-nin bəyanatında bildirilir.

Sənəddə qeyd edilir ki, BMT-nin hüquqşünasların rolu haqqında əsas prinsiplərinə uyğun olaraq, vəkillər "müştərilərinin maraqlarına hörmət etmək" öhdəliyi daşıyırlar.

Prinsiplərdə həmçinin deyilir ki, vəkillər öz müştərilərinə "bütün mümkün yollarla kömək edir və onların maraqlarının müdafiəsi üçün hüquqi addımlar atır".

Bu işdə (hamı üçün əlçatan olan materiallardan, o cümlədən Səfərovun foto və videogörüntülərindən) çoxsaylı amansız döyülmə əlamətləri aydın görünür.

Vəkilin müştərisinin həbsdə işgəncələrə və amansız rəftara məruz qaldığını hesab etmək üçün hər cür əsası var idi.

"Buna görə o (Sadıqov), müştərisinə mümkün hüquqi müdafiə vasiələrindən istifadə etməyi məsləhət etmək hüququna malik olmaqla birlikdə, bu, onun öhdəliyi idi", deyə bəyanatda bildirilir.

İCJ vəkilin müştərisi ilə onun hüquqları ilə bağlı məsələləri məxfi şəkildə müzakirə etmək cəhdinə görə məsuliyyətə cəlb edilib.

İCJ həmçinin peşə sirri zəmanətlərinə və beynəlxalq hüquq və milli prosedurlara zidd olaraq, Sadıqovun söhbətlərinin izlənilə biləcəyindən narahatdır.

İCJ Vəkillər Kollegiyasının müstəqil vəkillərə dəstəyini təsdiq etməsini, Sadıqova qarşı sanksiyaları ləğv etməsini zəruri hesab edir.

Təşkilat vəkillərin həbs yerlərində müştəriləri ilə ünsiyyətinin məxfiliyinə zəmanət vermək üçün qanunvericiliyin və təcrübənin təkmilləşdirilməsi məsələsinə baxmağa çağırır. -06D-