Mehriban Əliyevanın Fransaya səfəri haqqında

Bakı/13.03.19/Turan: Azərbaycanın birinci vitse-prezidenti Mehriban Əliyeva Fransaya rəsmi səfəri çərçivəsində martın 12-də Senatın sədri Jerar Larşe ilə görüşüb.

Rəsmi məlumata görə, Senat sədri qeyd edib ki, Fransa Azərbaycanla əməkdaşlığın inkişafında maraqlıdır.

Mehriban Əliyeva qeyd edib ki, o, Fransaya səfəri çərçivəsində iki ölkənin iqtisadi əməkdaşlığını möhkəmləndirmək məqsədilə bir sıra səmərəli görüşlər keçirib.

O, Fransa şirkətlərini Azərbaycanda daha fəal olmağa çağırıb, tərəflər arasında "Tərəfdaşlıq prioritetləri" sənədinin imzalanması fonunda Azərbaycanın Avropa İttifaqı ilə əlaqələrinin də yüksək səviyyədə olduğunu qeyd edib.

Qarabağ probleminin həllinə toxunan Əliyeva münaqişənin beynəlxalq hüquq normaları və Azərbaycanın ərazi bütövlüyü çərçivəsində həlli zərurətini vurğulayıb.

Elə həmin gün Əliyeva Fransa Milli Assambleyasının sədri Rişar Ferranla görüşüb. O, Azərbaycanın zəngin tarixinin və mədəniyyətinin daha yaxşı tanıdılması üçün iki ölkə parlamenti arasında əlaqələrin inkişafında maraqlı olduğunu bildirib.

Əliyeva Fransa Milli Assambleyasının sədrini Bakıya səfərə dəvət edib. Dəvət məmnuniyyətlə qəbul edilib.

Həmçinin, Əliyevanın Fransanın birinci ledisi Brijit Makronla görüşü baş tutub. Tərəflər ailə və qadın, gender bərabərliyi, təhsil, ətraf mühitin müdafiəsi məsələlərini müzakirə ediblər. Mehriban Əliyeva Brijit Makronu Azərbaycana səfərə dəvət edib.

Fransanın iqtisadiyyat və maliyyə naziri Bryuno Le Merlə görüşdə Fransanın Azərbaycanda yeni texnologiyalrın inkişafında iştirakı mümkünlüyü müzakirə edilib. Fransa naziri bu il Azərbaycana səfər edəcəyinə ümid etdiyini bildirib. -06D-