Binə qəsəbəsində şagirdlər dönərdən zəhərlənib

Bakı/25.10.23/Turan: Oktyabrın 24-də Bakının Binə qəsəbəsində yerləşən 88, 117, 121 və 149 nömrəli tam orta məktəblərdə təhsil alan 21 şagirddə müxtəlif vaxtlarda qida mənşəli narahatlıq və ürəkbulanma əlamətlərinin müşahidə edilməsi haqqında məlumat daxil olub.

Bu barədə Bakı Şəhəri üzrə Təhsil İdarəsi məlumat yayıb.

Məlumata görə, həmin məktəblərin müxtəlif siniflərində təhsil alan şagirdlərlə bağlı dərhal təcili-tibbi yardıma müraciət edilib və ilkin tibbi yardım göstərildikdən sonra şagirdlər xəstəxanaya yerləşdirilib.

Qeyd olunub ki, şagirdlər dərsə gələrkən və məktəbdən evə gedərkən Binə qəsəbəsi ərazisində fəaliyyət göstərən iaşə xidməti məkanlarından birindən dönər alıb yediklərini bildiriblər.

Məlumata görə, aidiyyəti dövlət qurumları tərəfindən müvafiq araşdırmalara başlanılıb, uşaqların səhhətləri isə Elm və Təhsil Nazirliyinin, Bakı Şəhəri üzrə Təhsil İdarəsinin, eləcə də TƏBİB rəhbərliyinin nəzarətindədir.

TƏBİB-dən Turan-a bildirilib ki, Sabunçu Tibb Mərkəzinin nəzdindəki 5 saylı Uşaq Yoluxucu Xəstəliklər Xəstəxanasında ümumilikdə 21 uşaq hospitalizasiya olunub.

Qurumdan vurğulanıb ki, onların hər birinə zəruri tibbi xidmətlər göstərilib: "Bir uşaq ailəsinin iltizamnaməsi ilə ambulator müalicə üçün artıq evə buraxılıb. Digərlərinin vəziyyəti stabildir", deyə TƏBİB-dən bildiriblər. 0