Biznesi əlindən alınanlar – Nazim Bəydəmirli "Çətin sual" qarşısında -Canlı

Bakı/13.04.21/Turan: Son günlər Azərbaycanda biznesmenlərin Azərbaycanda qurduqları biznesləri hakim dairələr tərəfindən əllərindən alınması ilə bağlı mediada xəbərlər yayılıb. Hazırda məhkəmə prosesi gedən “İdeal” mağazalar şəbəkəsinin həbsdə olan keçmiş sahibi İlqar İsmayılov iddia edir ki, o, “İdeal”ı əlindən alan şəxslərlə bağlı həqiqətləri dilə gətirdiyinə, dövlət orqanlarına şikayətlərinə görə cəzalandırılaraq susdurulmaq üçün həbs olunub. İlqar İsmayılovun anası Solmaz İsmayılova Prezident İlham Əliyev və Birinci vitse-prezident Mehriban Əliyevaya məktub ünvanlayaraq, ölkə rəhbərliyindən bu işi nəzarətə götürmələrini xahiş edib:

“Oğlum İlqar İsmayılov “İdeal Kompany” şirkətini 1999-cu ildə öz vəsaiti hesabına yaradıb. Bu şirkətin əmtəə nişanı tanınandan sonra - 2011-ci ildə “AZAL” QSC-nin direktoru, kifayət qədər nüfuza və gücə malik olan Cahangir Əsgərov oğlumdan onunla şərik işləməyi tələb edib. Oğlum təklifi qəbul edib, rəsmi 55, faktiki isə 50 faiz hissə pay Cahangir Əsgərovun həyat yoldaşı Zərifə Həmzəyevanın adına keçirilib.”

Solmaz İsmayılovanın sözlərinə görə, oğlu şirkətdə qalan payını və əmtəə nişanını vermək istəmədiyinə görə 2017-ci ildə şərlənərək həbs olunub. O, “İdeal”dan mənimsəmədə ittiham edilib. Həmçinin onun adına “Premium Bank”dan 5 milyon dollarlıq kredit götürməsi məsələsi ortaya çıxıb. İlqar İsmayılov isə bu ittihamların əsassız olduğunu, kredit müqaviləsindəki imzanın da ona məxsus olmadığını, imzasının saxtalaşdırıldığını bildirib.

“Oğlum 3 ay 10 gün həbsdə qaldı. Sonra isə yanına notariusla birlikdə “elçilər” getdi. Şirkətdəki payından tam və əmttə nişanı hüququndan imtina etməsi haqda sənədləri imzalatdırdılar. Elə həmin gün - 2017-ci il sentyabrın 15-də həbsdən azad edib tapşırdılar ki, “get və sus, yoxsa yenə həbsə qayıdarsan”.

Bundan sonra İlqar İsmayılov barəsində cinayət işinə xitam verilib. Lakin 3 il sonra yenidən bu məsələləri gündəmə gətirdiyi üçün yenidən həbs olunub. İlqar İsmayılov 2011-2017-ci illərdə vəzifəsindən sui-istifadə edərək, 680 min manata yaxın vəsaiti mənimsəməkdə təqsirləndirilir. Ona qarşı Cinayət Məcəlləsinin 179.3.2 (külli miqdarda məınimsəmə) və 308.2 (vəzifədən sui-istifadə etmə) maddələri ilə ittiham irəli sürülüb.

Azərbaycanda fəaliyyət göstərən daha bir iri holdinqin – “AKKORD" şirkətlər qrupunun təsisçisi İlqar Hacıyevin son müsahibəsi də son günlər müzakirə olunan mövzulardandır.  İlqar Hacıyev müsahibəsində deyir ki, 2008-ci ildə şirkəti 4 milyard dollar civarında qiymətləndirilib, illik dövriyyəsi 600 milyon avronu keçib, sonradan biznesmen həbslə, ölümlə hədələnərək 51%-i prezident ailəsinə ötürməyə məcbur edilib. Hacıyev qeyd edir ki, onun tərəfdaşı və himayədarı keçmiş Baş Prokuror Zakir Qaralov olub. Şirkətdə bir dəfə yoxlamada 100 milyon dollar əskik gəlib, Qaralov bunun hesabatını istəyəndə Hacıyev deyib ki, 100 milyon dolları Bəylər müəllim vasitəsilə prezident ailəsinə rüşvət kimi verib. İlqar Hacıyevin dediyinə görə "AKKORD" hər tikinti layihəsindən təxminən 30% "otkat" verib.

Azərbaycanda iri sahibkarların üzləşdikləri problemlərlə bağlı bu gün saat 15:00-da Kamran Mahmudovun təqdimatında yayımlanan“Çətin sual” verilişində iqtisadçı, sahibkar Nazim Bəydəmirli danışacaq.