“Quş qripi”nin növbəti dalğası

Bakı/13.04.21/Turan: Dünya Səhiyyə Təşkilatı  bildirib ki, bir sıra dövlətlərdə, o cümlədən Azərbaycanla qonşu ölkələrdə “quş qripi”nə yüksək yoluxma qeydə alınıb. Xəstəliklə yoluxma əksər hallarda vəhşi quşlarla təmas nəticəsində baş verir.

Bununla əlaqədar Azərbaycan Respublikası Qida Təhlükəsizliyi Agentliyi  aprelin 12-də “quş qripi” üzrə epizodik vəziyyətin beşgünlük monitorinqinə başlayıb.

Analizlər ölkə ərazisində yerləşən su hövzələrində quş yuvalarında aparılır.

Azərbaycan “quş qripi”nin əsas yayıcıları olan köçəri quşların hərəkət marşrutunda yerləşir. Həmçinin burada, əsasən də Xəzər sahillərində, ovalıqda bir çox dövlət qoruqlarının bataqlıq sahələrində vəhşi quşların daimi və müvəqqəti qışlama əraziləri yerləşir.

Əvvəllər bir sıra ölkələrdən, o cümlədən Almaniya, Nepal, Estoniya, Küveyt, İran və Ukraynadan quş əti və onun məhsullarının gətirilməsinə qadağa qoyulub. Bu, ötən ilin fevralında olduğundan azdır, belə ki, ötən il bu qadağa 12 ölkəyə aid edilmişdi.

Azərbaycan Respublikası Qida Təhlükəsizliyi Agentliyi sahibkarları diqqətli olmağa və problemə ciddi yanaşmağa çağırıb.

Azərbaycanda ilk dəfə H5N1 yüksək patogen “quş qripi” 9 fevral 2006-cı ildə Abşeronda vəhşi quşlarda təsdiq edilib və vaxtaşırı özünü büruzə verir.

2008-ci ildə qrip pandemiyasına hazırlıq üzrə Milli Plan qəbul edilib və Azərbaycan Respublikasında “quş qripi” xəstəliyinin qarşısının alınması üzrə Dövlət Komissiyası tərəfindən təsdiqlənib.—0—