Bloger Tural Sadıqlı Londonda avtomobilinə hücum olduğunu bildirib

Bakı/03.11.21/Turan: Bloger, “Azad söz” kanalının təsisçisi Tural Sadıqlı noyabrın 2-də Londonda onun avtomobilinə hücum olduğunu bildirib.

“Azad söz” Youtube kanalında yayımlanan videoçarxda o bildirib ki, Londonda Azərbaycan prezidenti İlham Əliyevin ailəsinə məxsus daşınmaz əmlak obyektlərini çəkərkən park etdiyi avtomobilinin şüşəsi sındırılıb.

Sadıqlının kompüteri maşından oğurlanıb, bundan sonra o, sosial şəbəkələrdəki hesablarını silib.

Sadıqlı London polisinə şikayət edib.

O bildirib ki, üç həftə Əliyevlər ailəsinin əmlakını çəkmək üçün Londona gedəcəyini anons edib. Bundan sonra mesencerinə hədələyici mesajlar gəlib.

"Məni ölümlə, Azərbaycanda ailə üzvlərimə problemlərin olacağı ilə hədələdilər", - Sadıqlı deyib.

O, avtomobilə hücumu bu təhdidlərin davamı ilə əlaqələndirir.

Sadıqlı onunla fiziki haqq-hesab çəkilməsinin mümkünlüyünə görə məsuliyyəti Azərbaycan hakimiyyətinin üzərinə qoyub. Bununla yanaşı, korrupsiya ilə bağlı araşdırmalarını davam etdirəcəyini bildirib.

Xatırladaq ki, oktyabrın 3-də Beynəlxalq Araşdırmaçı Jurnalistlər Konsorsiumu "Pandora dosyesi" adlanan bəzi dünya liderlərinin offşor hesablarına dair 11,9 milyona yaxın sənəddən çıxarışları dərc edib. Azərbaycanın dövlət başçısına gəlincə, onun ailə üzvlərinin xaricdə 700 milyon dollarlıq daşınmaz əmlak alması haqda danışılır.

Əliyev özü "Pandora dosyesi"ndən korrupsiya ilə bağlı materialları təkzib edib. O, İtaliyanın La Repubblica qəzetinə müsahibəsində deyib ki, bu materialların ancaq 5 faizi həqiqətdir. O qeyd edib ki, əvvəllər "uğurlu sahibkar" olub, prezident seçildikdən sonra  öz biznesini ailəsinə ötürüb.—06D-