Cahangir Hacıyevin bacısı dövlət orqanlarının özbaşınalığından şikayətlənir

Bakı/14.05.19/Turan: "Azərbaycan Beynəlxalq Bankı" ASC-nin keçmiş rəhbəri Cahangir Hacıyevin bacısı Əminə Hacıyeva mətbuat üçün bəyanat verərək hüquqlarının əsassız şəkildə pozulduğunu bildirib.

Belə ki, 2015-ci ildə qardaşı cinayət məsuliyyətinə cəlb edildikdən sonra onun ölkədən çıxışına qadağa qoyulub. Bu qadağa qüvvədə qalır, baxmayaraq ki, yarım il öncə Avropa İnsan Hüquqları Məhkəməsi onun şikayətini təmin edib və Azərbaycandan çıxışına qadağa qoyulmasını qanunsuz hesab edib.

Ə.Hacıyeva həmçinin mülkiyyət hüququnun pozulduğunu bildirib. Artıq 3,5 ildir ki, Ədliyyə Nazirliyinin gizli sərəncamı ilə mərhum anasından qalmış əmlakı öz adına sənədləşdirə bilmir.

Bundan əlavə, həbsdə olan C.Hacıyevi 2017-ci ilin payızından 2018-ci ilin yayına qədər bacısı və vəkilləri ilə görüşdən, həmçinin telefon danışıqlarından məhrum ediblər.

Ə.Hacıyevanın sözlərinə görə, son 8 ayda qardaşına baş çəkə bilməyib. Bundan əlavə, keçmiş bankirə doğmaları ilə danışmağa icazə verilmir, hətta kitab verilmir.

"Vəkillər ilə birlikdə Penitensiar Xidmətə müraciətimizə cavab olaraq deyirlər ki, görüşə və telefon danışıqlarına qadağa yoxdur və bizi prokurorluğa yönləndirirlər, onlar da geriyə Penitensiar Xidmətə. Bu, tamamilə özbaşınalıqdır, insanları ələ salmaqdır", - Ə.Hacıyeva yazıb.

Qardaşının cinayət işinə toxunan Ə.Hacıyeva bildirir ki, istintaq qeyri-obyektiv aparılır. Belə ki, qardaşının vaxtında ABB-nin verdiyi kreditlərdən təyinatı üzrə istifadə olunub və qeyri-neft sektorundakı müəssisələrin 70%-i onların hesabına fəaliyyət göstərib. Minlərlə iş yeri yaradılıb.

C.Hacıyevin həbsindən sonra həmin müəssisələrin əksəriyyəti bağlanıb, bir hissəsi isə dəyər-dəyməzinə satılıb.

"2010-cu ildə vergi orqanları həmin müəssisələri yoxlayıblar və cinayət tərkibi olmadığına görə iş bağlanıb. Ancaq istintaq zamanı həmin rəylər "yoxa çıxıb", -Ə.Hacıyeva yazır.

Sonda o qeyd edib ki, ədalətin bərpasına nail olmayacağı təqdirdə kömək üçün beynəlxalq təşkilatlara müraciət etməli olacaq.

*Cahangir Hacıyev 2015-ci il dekabrın 5-də həbs olunub. Bakı Ağır Cinayətlər Məhkəməsi onu 15 il azadlıqdan məhrum edib.

C.Hacıyev və digər yeddi nəfər külli miqdarda ziyan vurmaqla sui-istifadə, dələduzluq, mənimsəmə, israfçılıq, vəzifə səlahiyyətini aşmaq, rüşvət verməkdə təqsirli bilinib.

2018-ci ilin dekabrında baş prokuror bildirib ki, C.Hacıyevə qarşı yeni maddə - külli miqdarda vəsaitin mənimsənilməsi, cinayətkar yolla əldə edilmiş vəsaitin leqallaşdırılması, vergidən yayınma və s. üzrə ittiham irəli sürülüb.

O, real dəyəri olmayan veksellerin alqı-satqısına dair ümumı məbləği 3.4 milyard dollar və 987 milyon avro həcmində sövdələşmələr bağlamaqda ittiham olunur.

Istintaqın bildirdiyinə görə, C.Hacıyevin göstərişi ilə ümumi məbləği 900 mln. manat həcmində pul vəsaitinin manat və xarici valyutada leqallaşdırılması məqsədilə çoxsaylı kredit müqavilələri bağlanıb. Həmin vəsaitlər mənimsəmə məqsədilə bankın hesabından başqa hesablara köçürülüb.

İstintaq C.Hacıyevi keçmiş deputat Dünyamin Xəlilov və digər 20 nəfərlə birlikdə 4,7 milyard manatı məminsəməkdə ittiham edib.

Bundan əlavə, istintaqın məlumatına görə, C.Hacıyev D.Xəlilov (2011-2014-cü illərdə "Aztorq" MMM-nin faktiki rəhbəri olub) ilə birlikdə 1 mln. 752 min manat məbləğində vəsaiti dövlət büdcəsinə ödəməyib.

C.Hacıyev və D.Xəlilov bütün ittihamları rədd ediblər.-06B---