C.Sümərinli: İslahatlar olmasa ordunun dağıla bilməsi təhlükəsi yaranır

Əsgər Ceyhun Qubadovun hərbi xidmətdə ölümü ordu daxilində gərgin vəziyyət olmasının göstəricisidir. “Doktrina” Jurnalistlərin Hərbi Araşdırma Mərkəzinin rəhbəri Cəsur Sümərinli bu sözləri əsgər C.Qubadovun ölümü fonunda orduda baş verənləri Turan-a şərh edərkən bildirib.

O, son 10 ilin statistikasında orduda qeyri-döyüş itkilərinin artan dinamika ilə inkişaf etdiyini nəzərə çatdırıb. Onun fikrincə, bu idarəetmədəki ciddi problemlər, həm hərbi hissələrdə Nizamnaməyə əməl olunmaması, həm şəxsi heyət arasında münasibətlərin qaydada olmaması, həm də orduda yayılmış rüşvət və korrupsiya ilə bağlıdır. C.Sümərinli C.Qubadovun ölümünün bu neqativlərin hamısını üzə çıxardığını söyləyib. Cəmiyyətin bu hadisəyə təpkisinin yerində olduğunu bildirib. Onun fikrincə, ölkə rəhbərliyi orduda ciddi nizam-intizama nail ola bilmək üçün islahatlar aparmalı, şəffaflıq təmin olunmalı, şəxsi heyətin sosial təminatı gücləndirilməli, inidki ordu rəhbərliyi istefaya göndərilməlidir. 

“Əgər indiki durum bundan sonra da davam etsə, bu, partlayışa, dövlətin onurğa sütunu olan ordunun dağılması tıəhlükəsinə səbəb ola bilər”, - deyə C.Sümərinli mövqeyini ifadə edib. Ordu kimi həddən artıq ciddi, həssas bir məsələyə laqeyd yanaşmağın təhlükəli olduğunu deyən C.Sümərinli indiki ordu rəhbərliyinin orduda hər-hansı islahat aparmaq gücündə olmadığını söyləyib. O, ordunun indiki rəhbərliyi vəzifə başında qaldıqca ordu daxilində neqativlərin ancaq artacağı xəbərdarlığı edib. -05B-