Demokratik azadlıqlar sahəsində vəziyyət pisləşir - hüquq müdafiə qurumu

Bakı/28.02.22/Turan: "Azərbaycanda işgəncələr qarşı mübarizə sahəsində vəziyyət olduqca bərbaddır və getdikcə insan hüquq və əsas azadlıqlarının vəziyyəti aşağı düşməkdədir, hər addımda insanlara işgəncə verilir, hüquqları pozulur".

Bu barədə "İşgəncələr Əleyhinə Araşdırmalar Mərkəzi" ictimai birliyinin 2022-ci ilin yanvar və fevral ayları üçün insan hüquqları və işgəncə hallarına dair hesabatında deyilir.

İşgəncələr Əleyhinə Araşdırmalar Mərkəzinin monitorinqinə, müşahidələrinə əsasən Azərbaycanda son aylarda ən çox siyasi hüquqlar, azad-fikir və şəxsi toxunulmazlıq, ədalətli məhkəmə araşdırılması, mülkiyyət, işgəncəyə və ayrı-seçkiliyə məruz qalmamaq hüquqları pozulub. İctimai-siyasi xadimləri, ictimai fəalları şantaj və susdurmaq məqsədi güdən, mediada və sosial şəbəkələrdə yayılan şəxsi yazışmalar, şəkillər, videolar hüquq-mühafizə orqanları tərəfindən araşdırılmır və bu sahədə vəziyyət heç də ürək açan deyil", deyə sənəddə qeyd edilir.

Mərkəz hesab edir ki, məhkəmələr siyasi hakimiyyətdən tam asılıdır və onlardan ədalətli məhkəmə araşdırılması gözləmək mümkün deyil, siyasi movitli işlərdə siyasi sifarişləri yerinə yetirirlər.

"Sosial cəhətdən kasıb yaşayan təbəqə sosial ədalətsizlikə üzləşir və o cümlədən də qanuni meyarlarla əlillik dərəcələri alan vətəndaşların qanunsuz olaraq imtiyazları, əlillik dərəcələri ləğv edilir. Mərkəzin müşahidələrinə əsasən, bu qəbildən olan qazilər əlillik dərəcəsinin müəyyən olunması və sosial müavinətlərin alınmasında əziyyət çəkirlər. Dövlət strukturların əsassız süründürmənçilikləri, rüşvət-korrupsiya və bürokratiya səbəbindən səmərəli iş fəaliyyətləri yoxdur", deyə sənəddə qeyd edilir.

Hesabatda bu ilin yanvar-fevral aylarında Milli Şuranın, Xalq Cəbhəsi və Müsavat Partiyasının fəallarına qarşı insan hüquq və azadlıqlarının pozulması, işgəncə, qeyri-insani rəftar və məhkəmə-hüquq sistemindəki hüquq pozuntuları ilə bağlı faktar təqdim edilib.

"Milli Şura və Müsavat Partiyasının üzvü Tofiq Yaqublu Bakı şəhəri Fəvvarələr meydanında AXCP üzvü və hazırda siyasi motivlə həbsdə olan Saleh Rüstəmlinin qanunsuz olaraq azadlıqdan məhrum edilməsinə etiraz olaraq keçirdiyi aclıq aksiyasına bir qrup siyasi fəal tərəfindən təşkil edilmiş dinc dəstək aksiyasında iştirak etdiyi zaman polis əməkdaşları tərəfindən heç bir əsas olmadan saxlanılıb, Ələt qəsəbəsinə aparılaraq ağır işgəncələr verilib. Keçmiş Baş prokuror və həbs olunana qədər xarici ölkələrdə səfir işləmiş Eldar Həsənov saxta və qurama ittihamla 10 il müddətinə azadlıqdan məhrum edilib. İctimai fəal Fuad İsmayılov əsassız olaraq Nizami rayon Polis Bölməsi tərəfindən saxlanılıb, ağır işgəncələrə məruz qalmaqla  İnzibati Xətalar Məcəlləsinin 535-ci maddəsinə (Polis işçisinin və ya hərbi qulluqçunun qanuni tələbinə qəsdən tabe olmama) əsasən Nizami rayon Məhkəməsi tərəfindən qanunsuz olaraq 30 sutkalıq inzibati həbs verilib".

Sənəddə həmçinin bildirilir ki, Almaniyada mühacirətdə olan AXCP üzvləri - Mütəllim Oruc, Malik Rzayev, Pünhan Kərimli və Cəfər Mirzəyev Azərbaycana deportasiya olunandan sonra onlara qarşı qanunsuz, qurama cinayət işi açılıb və onlar qanunsuz olaraq həbs olunublar.

Mərkəz Vətəndaş və İnkişaf Partiyasının sədri Əli Əliyevin böhtan ittihamı ilə həbs edilməsinə, "Tərtər işi" kimi tanınan cinayət işi üzrə işgəncələrə və digər faktlara da toxunub.

Öz növbəsində, Azərbaycan hökuməti ölkədə insanların qanun qarşısında bərabər olduğunu, insanların əqidəsinə görə təqib edilmədiyini bildirir. Ölkə rəhbəri insanların bütün fundamental hüquqlarının tam qorunduğunu dəfələrlə qeyd edib. İşgəncələrlə bağlı yazılanlara gəlincə, hüquq-mühafizə orqanları bu kimi hallarla bağlı bəyanatları təkzib edir və onların şəxslərin özünümüdafiə mqəsədi daşıdığını bildirir. -03-