"Demokratiya 1918" Hərəkatı fəaliyyətini dayandırır

Bakı/11.09.23/Turan: "Demokratiya 1918" Hərəkatının 10 sentyabr 2023-cü ildə keçirilən növbədənkənar qurultayında səs çoxluğu ilə hərəkatın fəaliyyətinə xitam verilməsi qərara alınıb. Bu barədə təşkilatın Facebook səhifəsində yer alan məlumatda deyilir.

"Ölkədəki anti-demokratik sistem və onun yaratdığı siyasətsizlik mühiti hər hansı bir formada siyasi fəaliyyəti mümkünsüz edir. Bunun qarşısında isə resurs məhdudluğu müsbət dəyişikliklər edilməsi üçün adekvat cavab imkanını məhdudlaşdırır. Bütün bu səbəblərdən ötrü artıq siyasi səhnədə hər hansı bir qurumun siyasi iddia irəli sürməsi və təşkilatlanması öz əhəmiyyətini itirir.

İnanırıq ki, obyektiv və subyektiv səbəblər yetişdikdən sonra siyasi dəyişikliklərin rəhni olacaq təşkilatlar yenidən ortaya çıxacaqdır", deyə bəyanatda bildirilir.

"Bir siyasi dönəmin daha sonuna çatdıq. Bu günə qədər bizi dəstəkləyən və diqqət göstərən hər kəsə təşəkkür edirik. Bundan sonra hər hansı bir formada siyasi təşkilat daxilində yer almayacaq və ictimai fəal olaraq fəaliyyət göstərəcəyəm. Siyasətin olmadığı və siyasi mühitin məhv edildiyi bir ölkədə yeniliklər etməyə çalışdıq. Nə qədər uğurlu alındı, bunu zaman göstərəcək. Amma bundan sonra hakimiyyəti qurmaq istədiyi siyasi konfiqurasiya ilə baş-başa buraxırıq. Fərdlər içində olduğu sistemi dəyişmək istəmirsə, kollektiv təşkilatlanma da öz əhəmiyyətini itirir", deyə Hərəkatın lideri Əhməd Məmmədli bildirib.

* "Demokratiya-1918" (D18) Hərəkatı bir qrup fəal tərəfindən 2014-cü ildə, Azərbaycanda demokratik ideyaların təşviqi və insan hüquqlarının təmin edilməsi məqsədilə yaradılıb. 06B