"Demokratiya - 1918" Hərəkatı polisin təzyiq göstərdiyini bildirir

Bakı/17.03.22/Turan:  Polis "Demokratiya - 1918" Hərəkatını ofisindən məhrum etmək üçün ona təzyiq göstərir.

Təşkilatın sədri Əhməd Məmmədli Turan-a bildirib ki, martın 15-də sahə polis müvəkkili, 20-ci polis bölməsinin əməkdaşı və mülki geyimli şəxs Nəsimi rayonunda icarəyə götürdükləri ofisə gəliblər.

"Onlar qonşulardan şikayət olduğunu bildirdilər. Sonra pandemiya ilə əlaqədar profilaktik yoxlama üçün gəldiklərini söylədilər. Sonra ofisdə olan fəalları cərimə etməyə cəhd etdilər", -Məmmədli deyib.

Sonra kimsə onlara telefon edib və onlar "mövzunu dəyişiblər". “Gələn zəngdən sonra ofisdə kamera olub-olmadığını, burada hansı fəaliyyətlə məşğul olduğumuzu, bizim vergidən yayındığımızı, ofisin adamlar üçün təhlükəsiz olmadığını bildirərək ofisdən hər an narkotik maddə və terrorçuluqla bağlı hər hansı fəaliyyətin aşkar oluna biləcəyi ilə bağlı açıq-aşkar təhdid edildik”, - Məmmədli davam edib.

Onun sözlərinə görə, elə həmin axşam yerin  sahibi zəng edərək  ofisdən çıxmalarını  xahiş edib. "Bu, bizi təəccübləndirmədi. Çünki bizi artıq 3-4 dəfə oxşar ssenari üzrə çıxarıblar", - Məmmədli deyib.

O qeyd edib ki, martın 20 və ya 21-i mətbuat nümayəndələrinin iştirakı ilə ofisi tərk edəcəklər.

“Ofisin qapadılması Prezident Administrasiyasının göstərişilə həyata keçirilib", - Məmmədli ehtimal edir. O, bunu gənclərin fəallığından ehtiyat etdiyi üçün hakimiyyətin təzyiq kimi qiymətləndirib.

Öz növbəsində, Daxili İşlər Nazirliyinin mətbuat xidmətinin nümayəndəsi Elşad Hacıyev Turan-a bildirirb ki, “Demokratiya-1918” təşkilatının üzvlərinə təzyiq edilməsi barədə fikirlər əsassızdır və həqiqəti əks etdirmir. “Polis tərəfindən hansısa şəxsə və təşkilata siyasi təzyiq göstərilməsilə bağlı iddialar manipulyasiyadır”, - o qeyd edib.

"Demokratiya -1918" Hərəkatı 2013-cü ildə Azərbaycanda demokratik ideyaların inkişaf etdirilməsi və insan hüquqlarının təmin edilməsi məqsədilə bir qrup fəal tərəfindən D18 adı ilə  yaradılıb. Təşkilatın adı Hərəkatın  Azərbaycanda ilk respublikanın – 1918-ci ildə elan edilmiş və 1920-ci ilə qədər mövcud olmuş Azərbaycan Xalq Cümhuriyyətinin ideyalarına sadiqliyini göstərir. – 03B06