Deportasiyalarının ildönümündə Krım tatarlarının aksiyası

Bir qrup Krım tatarı bu gün tarixi vətənlərindən deportasiyalarının növbəti ildönümünə həsr olunmuş aksiya keçirib. Şəhidlər Xiyabanında toplaşan Krımlılar 1918-1920-ci illərdə Bakıda bolşeviklərlə döyüşlərdə həlak olmuş türk əsgərlərinin abidəsini ziyarət ediblər. Abidə önünə çələng qoyduqdan sonra onlar Qarabağ döyüşlərində həlak olmuş Azərbaycan əsgərlərinin xatirəsinə ucaldılmış abidəni ziyarət ediblər. Aksiya iştirakçıları 1944-cü ildə deportasiya zamanı həlak olmuş tatarlar və düşmənlərlə döyüşlərdə həlak olmuş türk əsgərlərinin ruhuna dualar oxuyublar.

Aksiya başa çatdıqdan sonra Xiyabanın yanına gələn Ukrayna səfirliyinin maşınları aksiya iştirakçılarını səfirliyə qəbula dəvət ediblər. Səfir Aleksandr Mişenko ilə görüşdə Krım problemi, tarixi köklər və Rusiyanın siyasəti haqqında fikir mübadiləsi aparılıb.

Səfir Krımın işğalının əbədi olmayacağındam və bu yarımadanın gec ya tez Ukraynanın tərkibinə qayıdacağından əmin olduğunu bildirib.

Krım tatarlarının nümayəndələri də özlərini Ukrayna vətəndaşı hesab etdiklərini təsdiq ediblər və Moskvanın imperiya siyasətini pisləyiblər. Onlar bildiriblər ki, Ukrayna Radasına müvafiq müraciət göndəriblər.

Daha sonra Krımın tarixi, deportasiyanın səbəbləri və böyük dövlətlərin siyasəti haqqında fikir mübadiləsi aparılıb.

Xatırladaq ki, 1944-cü ildə Stalinin əmri ilə yüz minlərlə tatar - bu yarımadanın əsl tarixi sakinləri Krımdan deportasiya olunub. Onların yarısı Sibirə və Qazaxıstana gedərkən yolda həlak olub.

2014-cü ildə Krımın Rusiya tərəfindən işğal edilməsindən sonra tatarların hüquqları yenidən pozulmağa başlayıb və minlərlə insan Vətənini tərk etmək məcburiyyətində qalıb. -02D-