DİN-dən �narkotikli konfet� açıqlaması

Bakı /26.01.18/Turan: Bakıda məktəblərdən birinin qarşısında şagirdlərə narkotik tərkibli konfetlərin satılması barədə xəbərlərin əsası yoxdur.

Daxili İşlər Nazirliyinin mətbuat xidmətinin yaydığı məlumatda belə deyilir.

"İctimaiyyətin narahatlığına səbəb olmuş bu məsələ ilə əlaqədar bildiririk ki, yayılmış məlumatların heç bir əsası yoxdur. Ölkə vətəndaşlarında çaşqınlıq yaratmağa hesablanmış oxşar təxribat xarakterli dezinformasiyalar əvvəllər bəzi ölkələrin paytaxtlarındakı, sonuncu dəfə isə Qazaxıstanın Aktau şəhərində yerləşən məktəblərin biri ilə bağlı da yayılıbmış. Lakin araşdırmalar zamanı bu məlumatların heç biri öz təsdiqini tapmayıb", DİN-in məlumatında bildirilir.

Nazirlik vurğulayır ki, Bakı şəhərindəki bütün təhsil müəssisələrinin təhlükəsizliyi həm müasir müşahidə kameraları, həm də polisin mühafizə xidməti və digər qurumlar tərəfindən təmin olunur.

"Bu günədək respublika ərazisində fəaliyyət göstərən heç bir orta məktəbdə və digər təhsil müəssisəsində şagirdlərə mənşəyi məlum olmayan, narkotik tərkibli ərzaq və ya qida məhsulunun paylanılmasına, yaxud satılmasına dair hər hansı fakt qeydə alınmayıb", açıqlamada vurğulanır.

Nazirlik qeyd olunan məzmunda məlumatları "uydurma, əsassız" adlandırıb və vətəndaşları onara inanmamaga çağırıb.

DİN-in açıqlamasında qeyd olunur ki, bəzi xəbər saytları guya Bakı şəhərindəki məktəblərdən birinin qarşısında uşaqlara narkotik tərkibli konfetlərin paylanılması barədə məlumatlar yayılıb. Həmin xəbərlərin ayrı-ayrı vətəndaşların sosial şəbəkələrdəki yazışmalara əsaslandığı bildirilir.-0-