Diplomlarının tanınmasından imtina olunan ali məktəblər

Bakı/30.03.21/Turan: Təhsildə Keyfiyyət Təminatı Agentliyində (TKTA) xarici ali təhsilə aid kvalifikasiyaların tanınması üzrə müraciət edən ərizəçilər barədə mənfi qərarların səbəbləri arasında aşağıda qeyd edilən iki göstərici üstünlük təşkil edir. Bu iki səbəbdən birincisi, tələbənin təhsil səviyyəsi və forması üzrə ali təhsil müəssisəsində tələb olunan müddətdən az olması, ikincisi isə təhsilin məzmununu mənimsəmək üçün tələb olunan minimal dil biliklərinin olmamasıdır. Bu barədə Azərbaycan Təhsil Naziriyinin martın 30-da yaydığı məlumatda deyilir.

Qeyd olunur ki, 2017-ci ildən verilən imtinaların 25 faizi ümumilikdə 10 ali təhsil müəssisəsini əhatə edir.

“Həmin ali təhsil müəssisələrinin tələbələri ali təhsil standartlarına cavab vermədiyi, təhsil müəssisəsində tələb olunan müddətdən dəfələrlə az iştirak etdiyi və təhsil aldığı dildə sadə ünsiyyət belə qura bilmədiyi hallarda da məzunlara diplom təqdim edir”, - məlumatda vurğulanır.

Nazirlik eyni zamanda ən çox imtina edilən ali məktəblərin də adlarını təqdim edir:

Regionlararası Heyətin İdarəolunması Akademiyası, 152

Simon Kuznets adına Xarkov Milli İqtisad Universiteti 103

İvanovo Dövlət Universteti 101

Ukrayna Dövlət Dəmiryol Nəqliyyatı Akademiyası 101

Karazin adına Xarkov Milli Universiteti 76

Dağıstan Dövlət Pedoqoji Universiteti  68

Poltava İqtisadiyyat və Ticarət Universiteti 68

Tbilisi Açıq Tədris Universiteti 64

Avropa Universiteti 60

Gürcüstan Texniki Universiteti 58  -05D-