DQMŞ Gültəkin Hacıbəylinin cinayət təqibini pisləyib

Bakı/19.12.22/Turan: Demokratik Qüvvələrin Milli Şurası (DQMŞ) bu qurumun Koordinasiya Mərkəzinin üzvü Gültəkin Hacıbəylinin cinayət məsuliyyətinə cəlb edilməsini pisləyən bəyanat yayıb.

Hacıbəyli noyabrın 30-da Brüsseldən qayıdarkən Bakı hava limanında, daha sonra 6 saat polis idarəsində saxlanılıb və sonda Nəsimi rayon məhkəməsində ifadəsi alınaraq sərbəst buraxılıb. Bəlli olub ki, Leyla Arif adlı şəxsin xüsusi ittiham qaydasında şikayəti əsasında Gültəkin Hacıbəyliyə Cinayət Məcəlləsinin 147.2 (ağır və ya xüsusilə ağır cinayətdə ittiham etməklə böhtan atma) maddəsi ilə cinayət işi açılıb.

Lakin bu barədə G.Hacıbəyli xəbərdar edilməyib. Özünün xəbəri və təbii ki, iştirakı olmadan G.Hacıbəyliyə qarşı bir neçə məhkəmə iclası keçirilib və axırda "üzrsüz səbəbdən məhkəməyə gəlmir" bəhanəsilə barəsində saxlanılma qərarı çıxarılıb. Halbuki, həmin dövrdə G.Hacıbəyli ölkədə olmayıb, onun ölkədə olmadığı haqda Dövlət Sərhəd Xidmətindən məhkəməyə arayış verilib, ünvanına göndərilən bildirişlər "burada müvəqqəti yaşamır" qeydi ilə məhkəməyə geri qaytarılıb.

Şikayətçinin iddiasına görə, Hacıbəyli onu facebook sosial şəbəkəsində üçüncu bir şəxsin yazısının müzakirə bölümündə separatçı və ksenofob adlandırmaqla ağır cinayətdə ittiham edib, mənəvi cəhətdən alçaldıb. Hərçənd Hacıbəyli şikayətçini nəinki ağır, ümumiyyətlə cinayət törətməkdə ittiham etməyib, sadəcə onun separatçılıq hərəkatına haqq qazandırmasına və Azərbaycanda yaşayan xalqları bir-birinə qarşı qoymaq cəhdlərinə "separatçı" və ksenofob" ifadələri ilə siyasi qiymət verib.

DQMŞ hesab edir ki, Leyla Arif adlı şəsxin şikayətinə hakimiyyət Gültəkin Hacıbəyliyə qarşı növbəti təqib-təzyiq üçün imkan kimi baxıb. Bu absurd məhkəmənin Hacıbəyliyə sərt cəza verilməsi ilə bitəcəyi də istisna edilmir.

Hakimiyyət 2022-ci ilin əvvəlindən Cinayət Məcəlləsinin 147-ci (böhtan) maddəsilə bir neçə səs-küylü həbslər həyata keçirib. Söhbət VİP sədri Əli Əliyevin və Tərtər cinayətlərinin ifşasında fərqlənən fəallar İlham Aslanoğlu və Abid Qafarovun həbsindən gedir.

Hökumət ölkədə real müxalifəti və vətəndaş cəmiyyətini tamamilə sıradan çıxarmaq istəyir, deyə DQMŞ-nin bəyanatında qeyd edilir.  "Siyasi partiyalar haqqında" yeni mürətce qanunun qəbulu, AXCP-nin sentyabr-noyabr aylarında keçirdiyi piketlərin aşırı polis zorakılığı və kütləvi həbslərlə dağıdılması timsalında ölkədə sərbəst toplaşmaq hüququnun faktiki ləğvi, nəhayət, ölkənin ən tanınmış ictimai-siyasi xadimlərindən biri Bəxtiyar Hacıyevin həbsi və Gütəkin Hacıbəyli kimi nüfuzlu xanım siyasətçinin həbsinə hazırlığın görülməsi bunun göstəricisidir.

Milli Şura Milli Şura hakimiyyətdən ölkədə real, köklü islahatların önünü açmağı, bütün siyasi məhbusları azad etməyi, repressiyalara son qoymağı, konkret halda Gültəkin Hacıbəyliyə qarşı cinayət işinə xitam verib məhkəmə təqibini dayandırmağı tələb edir. 06B