Əliabbas Rüstəmov aclığı dayandırıb

Bakı/09.08.19/Turan: Həbsdə olan hüquqşünas Əliabbas Rüstəmov 11 gün davam edən aclıq aksiyasını dayandırıb. Bu barədə jurnalist Şahvələd Çobanoğlu məlumat verib.

Onun sözlərinə görə, bu gün Ə.Rüstəmov ona telefon edərək bildirib ki, çoxsaylı müraciətləri nəzərə alaraq aclığı dayandırıb. Eyni zamanda onun şərti azadlığa buraxılması ilə bağlı avqustun 7-nə təyin edilmiş məhkəmə iclasının oktyabra keçirilməsini növbəti ədalətsizlik adlandırıb.

"Əliabbas özünü girov sayır. O, haqsızlığa qarşı həmişə mübariz olacağını bildirib və ona dəstək verənlərə təşəkkürünü çatdırıb", - Ş.Çobanoğlu qeyd edib.

Penitensiar Xidmətdən şərh almaq mümkün olmayıb.

*Əliabbas Rüstəmov 2014-cü il iyunun 28-də həbs edilib. Ona qarşı CM-in 312.2 (rüşvət vermə) və 313-cü (vəzifə saxtakarlığı) maddələri ilə ittiham irəli sürülüb. Bakı Ağır Cinayətlər Məhkəməsi onu 7 il azadlıqdan məhrum edib.

Ə.Rüstəmov və onun yaxınları təqib edilməsinin səbəbinin 2014-cü ildə prezident İlham Əliyevə yazdığı açıq məktub olduğunu hesab edirlər. O, məktubda hakimiyyəti korrupsiyada və milli sərvətlərin mənimsənilməsində ittiham edib.

2017-ci ilin iyulunda Ali Məhkəmə cəza müddətini 6 ilədək azaldıb. Ə.Rüstəmov ittihamları qəbul etməyərək onların saxtalaşdırıldığını bildirib. Hüquq müdafiəçiləri onu siyasi məhbus kimi tanıyıblar. -21B-