Əlil əlilliyi müdafiə edib

Bakı/04.08.22/Turan: İkinci qrup əlil Nəriman Abdullayev Əmək və Əhalinin Sosial Müdafiəsi Nazirliyinə  qarşı məhkəmə prosesini qazanıb. Bakı İnzibati Məhkəməsinin hakimi Mehriban Qarayeva Nəriman Abdullayevin xeyrinə qərar çıxarıb, onun şikayəti təmin edilib. Bu barədə vəkil Rauf Əzimov bildirib.

Beləliklə, ƏƏSMN-yi Abdullayevin əlillik dərəcəsini və əlillik pensiyasını bərpa etməlidir.

Vəkilin əsas arqumentlərindən biri o olub ki, qanunvericilik 10 il fasiləsiz əlillik pensiyası almış şəxsin əlilliyə görə pensiyadan məhrum olunmasını qadağan edir. Abdullayev 13 il pensiya alıb, ağır xəstəliklərdən əziyyət çəkib və bu müddətdə sağalmayıb.

Abdullayevin başına gələnlər və nazirlikdə ona qarşı ədalətsiz münasibət “Dövlət xəstə neftçiyə əlillik müavinəti verməkdən imtina edib” məqaləsində yazılıb.

Təəssüf ki, yazı dərc olunandan sonra agentliyin Əmək və Əhalinin Sosial Müdafiəsi Nazirliyilə yazışmaları müsbət nəticə verməyib. Nazirlik əlilliyin verilməsindən imtina edilməsində israrlı olub.—0--