Əlilliyin təyin edilməsi zamanı sui-istifadələrə görə 30 məmur cəzalandırılıb

Bakı/21.06.21/Turan: Əlilliyin qiymətləndirilməsi zamanı şəffaflığın və obyektivliyin təmin edilməsi üzrə işlərin davam etdirilməsi ilə yanaşı, bu sahədə qanunsuzluqlara qarşı mübarizə tədbirləri görülür. Toplanmış materiallar hüquqi qiymət verilməsi üçün müvafiq orqanlara təqdim edilib. Bu barədə Əmək və Əhalinin Sosial Müdafiəsi Nazirliyinin məlumatında deyilir.

Belə ki, əlilliyin qiymətləndirilməsi zamanı obyektiv qərarlar qəbul etməmiş ekspert komissiyalarının 11 əməkdaşı barəsində cəza tədbirləri görülüb.

Eyni zamanda sənədlərin saxtalaşdırılması faktlarının araşdırılması məqsədilə 266 şəxsin əlilliyi barədə sənədlər hüquqi qiymət verilməsi üçün Baş Prokurorluğa təqdim edilib.

5  və 7 nömrəli tibbi-sosial ekspert komissiyasının sabiq sədrləri və digərlərinin qanunsuz əməlləri ilə bağlı Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin müvafiq maddələri ilə cinayət işləri başlanıb.

5 nömrəli tibbi-sosial ekspert komissiyasının sabiq sədri Katib Məmmədov və digər əlaqəli  şəxslərə Cinayət Məcəlləsinin 308.1 (vəzifə səlahiyətlərindən sui-istifadə etmə), 311.3.3 (rüşvət alma külli miqdarda törədildikdə), 313 (vəzifə saxtakarlığı), 320 (rəsmi sənədləri saxtalaşdırma və istifadə etmə) və digər maddələri ilə yekun ittiham elan edilərək cinayət işi baxılması üçün Bakı Ağır Cinayətlər Məhkəməsinə göndərilib.

7 nömrəli tibbi-sosial ekspert komissiyasının sədri vəzifəsində işləmiş Oruc Məmmədov Cinayət Məcəlləsinin 311.2 (vəzifəli şəxs tərəfindən qanunsuz hərəkətlərə (hərəkətsizliyə) görə rüşvət alma) və 312-1.1 (vəzifəli şəxsin qərarına qanunsuz təsir göstərmə (nüfuz alveri)) maddələri ilə ittiham elan edilmiş, məhkəmənin qərarı ilə barəsində həbs qətimkan tədbiri seçilib. -06D-