Elşən Həsənov polis bölməsindən buraxılıb

Bakı/06.03.19/Turan: Hüquq müdafiəçisi Elşən Həsənov Sabunçu rayon polis idarəsinin 12-ci polis bölməsindən saat 15:00 radələrində buraxılıb. O, Turan-ın müxbiri ilə söhbətində bildirib ki, səhər saat 10 radələrində onun dalınca gəliblər və onu 12 saylı bölməyə aparıblar.

Onun sözlərinə görə, onunla bölmənin rəis müavini söhbət edib. Hüquq müdafiəçisinə partiya mənsubiyyəti, qohumları haqqında suallar verilib, ümumilikdə anket məlumatları yığılıb.

"Onlara dedim ki, partiyaların üzvü deyiləm, amma hüquq müdafiə fəaliyyəti ilə məşğul oluram, qohumlarım isə müxalif baxışlarımla əlaqədar mənimlə əlaqə saxlamırlar", deyə Həsənov bildirib.

Eyni zamanda, onu 19 yanvar mitinqində iştirakının səbəbləri haqqında dindiriblər. Həsənov deyib ki, mitinq bloger Mehman Hüseynovun və digər siyasi məhbusların azad edilməsi tələblərinə həsr olunmuşdu və o, bu mitinqdə hüquq müdafiəçisi kimi iştirak edib.

"Mən dedim ki, siyasi məhbusların işlərinə, həbs yerlərində işgəncə faktlarına həsr olunmuş mitinqlər olarsa, yenə onlarda iştirak edəcəyəm", deyə Həsənov bildirib. O qeyd edib ki, polisdə onunla yaxşı davranıblar.

Həsənov hesab edir ki, polisə çağırılmasının əsl səbəbi Siyasi Məhbuslara Azadlıq Uğrunda İttifaqın martın 4-də yeni siyasi məhbuslar siyahısını dərc etməsi ola bilər. Həsənov bu təşkilatın koordinatorudur. -06B-