Əmək Məcəlləsinin �cəzalandırma� bəndi

Bakı/11.10.17/Turan: Azərbaycan Dövlət İqtisad Universiteti İnformatika kafedrasının dosenti Eldar Hüseynovun işdən azad olunması ilə bağlı açıqlama yayıb.

Açıqlamada deyilir: İnformatika kafedrasının dosenti vəzifəsində çalışan Eldar Hüseynov əmək fəaliyyəti zamanı yol verdiyi kobud səhvlər nəticəsində işəgötürənin qanuni mənafeyinə ciddi xələl gətirdiyinə görə onunla bağlanmış əmək müqaviləsinə Azərbaycan Respublikası Əmək Məcəlləsinin 70-ci maddəsinin "ç" bəndinə əsasən xitam verilib".

Xatırladaq ki, adı çəkilən məcəllənin 70-ci maddəsinin "ç" bəndində deyilir ki, işçi özünün əmək funksiyasını və ya əmək müqaviləsi üzrə öhdəliklərini yerinə yetirmədikdə, yaxud bu Məcəllənin 72-ci maddəsində sadalanan hallarda əmək vəzifələrini kobud şəkildə pozduqda; sınaq müddəti ərzində işçi özünü doğrultmadıqda işdən azad edilir.

Qeyd edək ki, oktyabrın 6-da adı çəkilən universitetin rəhbərliyi Əmək Məcəlləsinin 70-ci maddəsinin "ç" bəndini əsas tutaraq universitetdə 28 ildir ki, elm tədris edən, dosent Eldar Hüseynovu vəzifədən azad edib. Amma E.Hüseynov açıqlamasında bidlirmişdi ki, onun işdən azad olunmasına səbəb kafedra müdirinin yaratdığı süni münaqişə və siyasi fəaliyyəti olub, dəfələrlə "ya AXCP, ya iş" seçimi qarşısında qoyulub.

Eyni zamanda universitetin açıqlamasından məlum olmur ki, E.Hüseynova məcəllənin tələbi olan sınaq müddəti verilibmi? Verilibsə hansı pozuntuya görə veriliməsi məlum olmur.

Həmçinin o da məlum olmur ki, dosent, 28 ilin müəllimi işəgötürənin hansı mənafelərinə xələl gətirib?

Xatırladaq ki, E.Hüseynov AXCP Rəyasət Heyətinin üzvüdür.