Erməni hərbçinin barəsində cinayət işi qaldırılıb

Azərbaycan Hərbi Prokurorluğu erməni hərbçi Arsen Bağdasaryana qarşı Azərbaycan CM-in bir neçə maddəsi ilə cinayət işi qaldırıb.

Hərbi Prokurorluqdakı mənbələr Turan-a bildiriblər ki, A.Bağdasaryan 2014-cü il dekabrın 26-da kəşfiyyat-təxribat qrupunun tərkibində Azərbaycan tərəfinnə qarşı təxribat törətmək üçün göndərilib. Lakin o, Azərbaycan hərbi qulluqçuları tərəfindən saxlanılıb.

Müəyyən edilib ki, o, Ağdərə rayonu ərazisində yerləşdirilən silahlı cinayətkar birliyin tərkib hissəsi olan 49971 saylı hərbi hissədə müqavilə əsasında kəşfiyyat bölüyünün 1-ci tağım komandiri vəzifəsində fəaliyyət göstərib.

O və birliyin üzvləri birliyin rəhbərindən (adı istintaqa məlumdur) Azərbaycanda qətl və təxribat törətmək barədə  göstəriş alıb.

Əsasən qrupa azərbaycanlı əsgərlərin hərəkət etdikləri yerlərə mina basdırılması barədə göstəriş verilib. Bu tapşırıq yerinə yetirilib, lakin qrup geri qayıdarkən ələ keçib, Bağdasaryan tutulub, qalanları qaça bilib.

A.Bağdasaryana qarşı CM-in beş maddəsi (cinayətkar qrupun tərkibində qətlə cəhd, təxribat cəhdi və s.) üzrə cinayət işi qaldırılıb.

Xatırladaq ki, erməni tərəfi bildirib ki, Bağdasaryan rejimi sistematik şəkildə pozduğuna görə ordudan qovulub və əsir düşdüyü zaman orduda xidmət etməyib.

Ötən gün İşgəncələr Əleyhinə Komitənin rəhbəri Bağdasaryana baş çəkib və onun Azərbaycan vətəndaşlığını qəbul etmək istədiyini bildirib.-02D-